Sybaılas jemqorlyqqa qarsy qyzmet «SQ-Farmatsııa» qoımalaryn tekserdi

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi, «Adaldyq alańy» jáne arnaıy monıtorıng tobynyń músheleri «SQ-Farmatsııa» JShS Nur-Sultan, Almaty, Shymkent jáne Aqtóbe qalalaryndaǵy qoımalaryna tekserý júrgizdi, dep habarlaıdy QazAqparat tilshisi.

Vedomstvo málimetinshe, tekserý barysynda atalǵan qoımalarda Covid-19 emdeý hattamasynda qoldanylatyn medıtsınalyq preparattar jetkilikti kólemde anyqtalǵan. Sondyqtan agenttik Katardan kelgen gýmanıtarlyq kómekti qoımadan Pavlodar oblystyq aýrýhanasyna berý protsesin tekseredi. Gýmanıtarlyq kómek jeke qorǵanys quraldary túrinde berilgen.

Agenttiktiń Shymkent qalalyq departamenti Qytaı Halyq Respýblıkasynyń gýmanıtarlyq kómeginiń qaladaǵy medıtsınalyq mekemelerde bólinýin qadaǵalaıdy. Oblystyq departament medıtsınalyq preparattar bar qoımalardy tekseredi.

«Sondaı-aq, Qytaı Halyq Respýblıkasy men Reseı Federatsııasynan kelgen gýmanıtarlyq júk Aqtóbe oblysyna túsken. Ony bólý kezeńin Sybaılas jemqorlyqqa qarsy qyzmet ókilderi baqylaýǵa alyp otyr. Olar medıtsınalyq kózildirikter, medıtsınalyq qorǵanys kostıýmderi, hırýrgııalyq qolǵaptar, termometrler jáne basqa da qorǵanys quraldary», - dep atap ótedi vedomstvodan.

Mańǵystaý oblysyna da Birikken Arab Ámirlikterinen vırýstan qorǵaný quraldary túrindegi gýmanıtarlyq kómek jetti. Osyǵan oraı oblys ákimdigi medıtsınalyq quraldardy bólýdi baqylaý boıynsha arnaıy komıssııa quryp otyr. Arnaıy komıssııanyń quramynda agenttiktiń «Adaldyq alańynyń» músheleri bar.

«Gýmanıtarlyq júkti baqylaý jáne jetkizý boıynsha mundaı jumystar elimizdiń barlyq óńirlerinde júrgizilýde»,- dep atap ótedi agenttikten.