Sybaılas jemqorlyqqa qarsy qyzmet ókiliniń atyn jamylǵan alaıaqtar ustaldy

NUR-SULTAN. QazAqparat – Ózin Sybaılas jemqorlyqqa qarsy qyzmettiń ókili dep tanystyrǵan birqatar alaıaq ustaldy. Bul týraly QR Sybaılas jemqorlyqqa qarsy is-qımyl agenttiginiń aǵa ofıtseri Dınara Qulymbetova málim etti, dep habarlaıdy QazAqparat tilshisi.

«2020 jyly jeke qaýipsizdik departamenti laýazymdy tulǵalardyń is-áreketterine qatysty 406 shaǵym men ótinishti qarady, 286 qyzmettik tergeý júrgizdi. Osyǵan oraı Sybaılas jemqorlyqqa qarsy qyzmet qyzmetkerleriniń jumys babyn paıda kórý maqsatynda paıdalanýǵa jol bermeý boıynsha is-sharany turaqty negizde júrgizip keledi. Sonymen qatar, ózderin Sybaılas jemqorlyqqa qarsy qyzmettin atynan tanystyratyn adamdardyń alaıaqtyq áreketter jasaý faktileri oryn alyp otyr», - dedi D. Qulymbetova onlaın rejımde ótken brıfıngide.

Onyń aıtýynsha, 2020 jyly shilde aıynda Sybaılas jemqorlyqqa qarsy qyzmettiń qyzmetkeri bolyp tanystarǵan Nur-Sultan qalasynyń turǵyny ustaldy. Birneshe ret alaıaqtyq áreket jasaý jáne asa iri somada para berýge ıtermeleý faktisi boıynsha jalpy somasy 70 mln teńgeden asatyn basqa azamattyń qarajatyn aldaý jolymen ıemdengen. Sonymen qatar onyń 2014 jyldan bastap asa aýyr qylmys jasaǵany úshin memleketaralyq izdeýde ekeni anyqtaldy.

Budan bólek D. Qulymbetova basqa da alaıaqtyq faktilerine toqtaldy.

«2020 jyly mamyr aıynda Sybaılas jemqorlyqqa qarsy qyzmet qyzmetkerleriniń jalǵan qyzmettik kýáligin paıdalanyp, Qyzylorda oblysy aýmaǵynda 1 mln teńgeden astam somaǵa azamattyń múlkin ıemdengen Túrkistan oblysy turǵynynyń alaıaqtyq áreketteriniń joly kesildi», - dedi ol.

Onyń sózine qaraǵanda, 2020 jyly jeltoqsan aıynda Almaty qalasynyń turǵyny aldaý jolymen ózin Sybaılas jemqorlyqqa qarsy qyzmet qyzmetkerleri retinde tanystyryp, basqa azamattyń sot óndirisinde qylmystyq is boıynsha máselesine oń sheshim jasaý úshin 5 mln teńge somasynda qarajatty ıemdengen. Qazirgi kezde alaıaqtyq faktisine qatysty sotqa deıingi tergeý júrip jatyr.