Sybaılas jemqorlyqqa qarsy qyzmet qyzmetkerlerine memlekettik nagradalar tapsyryldy

NUR-SULTAN. QazAqparat - Alık Shpekbaev Táýelsizdik kúnine oraı Sybaılas jemqorlyqqa qarsy qyzmet qyzmetkerlerine memlekettik nagradalardy tapsyrdy, dep habarlaıdy QazAqparat vedomstvonyń baspasóz qyzmetine silteme jasap.

Táýelsizdik kúni qarsańynda Sybaılas jemqorlyqqa qarsy is-qımyl agenttiginiń tóraǵasy Alık Shpekbaev sybaılas jemqorlyqqa qarsy mádenıetti qalyptastyrýǵa, parasattylyq qaǵıdattaryn ilgeriletýge, sondaı-aq zańdylyq pen quqyq tártibin qamtamasyz etýge qosqan úlesi úshin qoǵam belsendilerin marapattady. Marapattalǵandar qatarynda Sádibek Túgel, Aıgúl Soloveva, Aıman Omarova, Yrza Tursynzada, Tólegen Baıǵulov, Talǵat Nárikbaev, Marat Báshimov, Oleg Savelenko, Asqar Rahmatýlın, Raqym Oshaqbaev, Bolat Qasymov, Álııa Sembaeva jáne t.b. bar.

Sondaı-aq, Sybaılas jemqorlyqqa qarsy qyzmettiń 15 qyzmetkerine Memleket basshysynyń memlekettik nagradalary, Qurmet gramotalary men alǵys hattary tabys etildi.

Budan basqa, Agenttik tóraǵasynyń buıryǵymen úlgili qyzmeti jáne jumysynda joǵary nátıjelerge qol jetkizgeni úshin ortalyq apparat pen aýmaqtyq bólimshelerdiń qyzmetkerleri vedomstvolyq nagradalarmen marapattaldy.