Sybaılas jemqorlyqqa qarsy qyzmet qyzmetkeriniń jańa kýáligi tanystyryldy

NUR-SULTAN. QazAqparat - Búgin QR Sybaılas jemqorlyqqa qarsy is-qımyl agenttigi Kadr jumysy departamentiniń basshysy Nurlan Jaqsymbetov agenttik qyzmetkeriniń jańa úlgidegi qyzmettik kýáligin tanystyrdy, dep habarlaıdy QazAqparat tilshisi.

«Búgin sizderdiń nazarlaryńyzǵa agenttik qyzmetkeriniń qyzmettik kýáliginiń jańa úlgisin usynǵym kelip otyr. Nelikten biz eski formattan bas tarttyq? Birinshiden, sybaılas jemqorlyqqa qarsy is-qımyldyń jańa úlgisin parasattylyq ıdeologııasy negizinde ilgerilete otyryp, ótkenniń nyshandary men rámizderinen arylý óte mańyzdy. Qalypsha túrindegi kýálikter qoǵamda jaǵymsyz qabyldanatyndyǵy eshkimge qupııa emes jáne onyń teris paıdalanýmen, shekten shyǵýmen túsindirilýi durys sanalady», - dedi ol.

Onyń atap ótýinshe, ekinshiden, bul jańa úlgi únemdi jáne fýnktsıonaldy. Jańa kýálikterdi ázirleý quny eskige qaraǵanda 2,5 ese arzan. Bul kýálikterdiń kómegimen agenttiktiń ákimshilik ǵımarattaryna kirý júzege asyrylady. Úshinshiden, barynsha senimdi 6 qorǵanys júıesi bar. Sondyqtan ony qoldan jasaý táýekeli joq.

«Al jalǵan qaǵaz qyzmettik kýálikterin jasaý derekteriniń kóp ekendigi málim. Ókinishke qaraı mundaı faktiler sybaılas jemqorlyqqa qarsy qyzmetti de aınalyp ótken joq. Jaqynda ǵana halyqaralyq izdestirýde júrgen alaıaqtyń jalǵan qalypsha kýálikti paıdalanǵany týraly fakti anyqtaldy. Osyndaı alaıaqtar ózderin sybaılas jemqorlyqqa qarsy is-qımyl agenttiginiń qyzmetkeri retinde tanystyryp, paıdakúnemdik maqsatta adamdardy adastyrý nátıjesinde jumysymyzǵa nuqsan keltiredi. Azamattardyń senimin buzady», - dedi ol.

N. Jaqsymbetovtyń aıtýynsha, tórtinshiden, bekitilgen format halyqaralyq standarttarǵa sáıkes keledi.

«EYDU elderinde plastık ІD kartalardy polıtsııa, arnaýy qyzmetterdiń jáne memlekettik organdardyń qyzmetkerleri baıaǵydan paıdalanyp júr», - dedi Kadr jumysy departamentiniń basshysy.