Sybaılas jemqorlyqqa qarsy qyzmet elorda ákimdigin tekserip jatyr
QR Sybaılas jemqorlyqqa qarsy is-qımyl agenttiginiń bastamasymen Nur-Cultan qalasy ákimdiginiń, onyń aýdandyq bólimsheleri men vedomstvolyq baǵynysty uıymdarynyń qyzmetindegi sybaılas jemqorlyq táýekelderine syrtqy taldaý bastaldy. Taldaý júrgizý barysynda elorda ákimdiginiń quqyqtyq bazasy men uıymdastyrý-basqarý qyzmetin egjeı-tegjeıli zerdeleý josparlanýda.
Agenttik Tóraǵasynyń birinshi orynbasary O. Bektenovtiń aıtýynsha, búginde jergilikti atqarýshy organdardyń jemqorlyq osaldyǵy joǵary. «Aǵymdaǵy jyldyń 5 aıynda ǵana sybaılas jemqorlyqqa qarsy qyzmet ákimdikterdiń qyzmetkerlerimen jasalǵan 92 sybaılas jemqorlyq quqyq buzýshylyqty tirkedi, 76 adam qylmystyq jaýapkershilikke tartyldy. Áshkerelengenderdiń arasynda túrli deńgeıdegi 7 ákim men olardyń orynbasarlary, sondaı – aq, oblystyq basqarmalardyń 14 basshysy bar», - dedi.
Óz kezeginde, qala ákiminiń orynbasary A. Ámrın Agenttiktiń pılottyq nysandaǵy keshendi taldaý júrgizý týraly bastamasyn elorda ákimdiginiń basshylyǵy qoldaǵanyn atap ótti. Atalǵan taldaý Memleket basshysynyń sybaılas jemqorlyq faktorlaryn anyqtaý maqsatynda normatıvtik aktiler men jumys protsesterine taldaý júrgizý qajettiligine qatysty tapsyrmasyn oryndaý aıasynda júrgizilip jatqanyna basa nazar aýdardy.
Qalyptasqan tájirıbe boıynsha Sybaılas jemqorlyqqa qarsy qyzmet barlyq múddeli uıymdardy, azamattyq qoǵam ınstıtýttarynyń ókilderi men belsendi azamattardy taldaýǵa qatysýǵa shaqyrady.
Jergilikti atqarýshy organnyń, onyń aýdandyq bólimsheleriniń nemese vedomstvolyq baǵynysty uıymdarynyń qyzmetindegi yqtımal sybaılas jemqorlyq kórinisteri týraly aqparat bolǵan jaǵdaıda eskertýler men usynystardy kelesi elektrondyq mekenjaıǵa jiberýge shaqyramyz: risk.akimat@antikor.gov.kz.
