Sybaılas jemqorlyqqa qarsy qyzmet 105 mlrd teńgeniń urlanýyna jol bermedi

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi 105 mlrd teńge bıýdjet qarajatynyń urlanýyna jol bermedi. Bul týraly atalǵan vedomstvonyń Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

Nurlan Jaqsymbetov bıýdjet qarajatyn urlaýdy der kezinde eskertý - ony qaıtarýǵa kóp kúsh jumsaýdan áldeqaıda tıimdirek ekendigin atap ótti.

«Jalpy, Sybaılas jemqorlyqqa qarsy qyzmettiń 2018 jyldan bastap qazirgi ýaqytqa deıin júrgizgen qylmystyq-quqyqtyq jáne aldyn alýdyń keshendi jumystary 105 mlrd teńgeni jymqyrý men tıimsiz paıdalanýdyń aldyn alýǵa múmkindik berdi. Qarqyndy jumys jalǵasady. Bıýdjet qarajatynyń maqsatty jáne tıimdi jumsalýyn baqylaý, sondaı-aq jymqyrýdyń ýaqtyly jolyn kesý men zalaldy jedel óteý Sybaılas jemqorlyqqa qarsy qyzmettiń basym baǵyttary bolyp qala beredi», - dep atap ótti departament basshysy.