Sybaılas jemqorlyqqa qarsy kúrestegi eń bastysy - onyń aldyn alý - Kólik mınıstrligindegi keńes
ASTANA. Sáýirdiń 27-si. QazAqparat - Keshe QR Kólik jáne kommýnıkatsııa mınıstrliginde mınıstr Ábilǵazy Qusaıynovtyń tóraǵalyǵymen sybaılas jemqorlyqqa qarsy kúrestegi mindetterge arnalǵan jumys keńesi bolyp ótti. Keńes jumysyna mınıstrliktiń barlyq qurylymdyq bólimsheleriniń, basqarmalarynyń basshylary, ıdeologııalyq aktıv qatysty,
dep habarlaıdy QazAqparat.
Atalmysh mınıstrlik baspasóz qyzmetiniń habarlaǵanyndaı, keńes jumysyn ashqan mınıstr Ábilǵazy Qusaıynov sybaılas jemqorlyq qubylystarymen kúres eń aldymen adam faktoryn neǵurlym azaıtýdan bastalýǵa tıis ekendigin atap ótti. Másele qyzmet kórsetý men baqylaý ornatý kezinde móldirlikke qol jetkizýde, onyń ishinde kez kelgen múmkin bolǵan jaǵdaıda avtomattandyrylǵan júıe engizý qajet. Osyǵan baılanysty birinshi kezekte normatıvtik quqyqtyq bazany jetildirý, onymen qosa árbir sala boıynsha jańa erejeler men usynymdar ázirlep, bekitý qajet. Ekinshiden, kadrlarmen jumystyń barynsha aıqyn júıesin jasaý qajet, onda da jumysqa qabyldaý móldirliginen, olardy muqııat irikteýden bastap, olarmen kúndelikti atqaratyn jumysqa deıin eskerilýi kerek. Bul eń aldymen temir jol kóligi men kóliktik baqylaý salalaryna qatysty.
Kólik-kommýnıkatsııa kesheniniń árbir salasynda osy baǵytta atqarylyp jatqan jumystar jaıynda birqatar jaýapty adamdar esep berdi. Mınıstrliktiń Jaýapty hatshysy osy baǵyttaǵy jumystardy shıratý jóninde biraz usynystarymen bólisti.
Keńesti qorytyndylaı kele kólik vedomstvosynyń basshysy Ábilǵazy Qusaıynov: «sybaılas jemqorlyqqa qarsy kúreste biz, memlekettik qyzmetkerler retinde, salamyzdaǵy da, elimizdegi bolyp jatqandardyń barlyǵyna jaýaptymyz, ıaǵnı biz tutastaı memleketimizdiń bedeli jaıynda oılaýymyz qajet. Bir aıdyń kóleminde mınıstrliktiń sybaılas jemqorlyqqa qarsy kúres is-sharalar jospary týraly buıryqty qaıta jańartýymyz qajet. Bul baǵyttaǵy jumys barysyn júıeli túrde, naqtylap aıtqanda aı saıyn Jaýapty hatshyda, toqsan saıyn mınıstrde tyńdap otyrýymyz qajet. Budan tys salada atqarylyp jatqan jumystar jaıynda jurtshylyqty ýaqytyly habardar etip otyrýymyz kerek. Sondyqtan BAQ-na jıirek shyǵyp, olardyń kez kelgen jarııalanymdaryna shuǵyl is-qımyl jasap otyrý qajet», dedi.
