Sybaılas jemqorlyqqa qarsy kúres sharalaryn kúsheıtý, laýazymdy adamdardyń jaýapkershiligin arttyrý maqsaty kózdelýde
ASTANA. Sáýirdiń 30-y. QazAqparat - Zań jobasyn qabyldaý sybaılas jemqorlyqqa qarsy kúres sharalaryn kúsheıtýge, laýazymdy adamdardyń jaýapkershiligin arttyrýǵa múmkindik beredi.
Osy maqsatta ázirlengen «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy kúres máseleleri boıynsha ózgerister men tolyqtyrýlar engizý týraly» zań jobasyn Úkimet Májiliske usyndy, dep habarlaıdy QazAqparat.
Bul zań jobasy «Qazaqstan Respýblıkasynda qylmysqa jáne sybaılas jemqorlyqqa qarsy kúresti kúsheıtý jáne quqyq qorǵaý qyzmetin odan ári jetildirý jónindegi qosymsha sharalar týraly» Qazaqstan Prezıdentiniń 2009 jylǵy sáýirdiń 22-sindegi Jarlyǵynyń 4-tarmaǵyn oryndaý úshin ázirlengen.
Atalǵan Jarlyqqa sáıkes memlekettik qyzmet júıesindegi «múddeler qaqtyǵysy» uǵymyn zańnamalyq deńgeıde aıqyndaý qajet. Bul rette múddeler qaqtyǵysyn boldyrmaý jáne retteý tártibin reglamentteý, onyń ishinde memlekettik qyzmetshiniń memlekettik qyzmetten bosaǵannan keıin belgili bir merzim ishinde onyń qyzmettik mindetterin atqarý kezeńinde tikeleı baqylaýynda nemese onyń quzyretine sáıkes tikeleı baılanysty bolǵan kommertsııalyq uıymdarǵa jumysqa aýysýyna tyıym salýdy belgileý qajettiligi kórsetilgen.
Sondaı-aq memlekettik qyzmetshiler úshin belgilengen shekteýlerdi memlekettik uıymdarda jáne memlekettiń qatysý úlesi bar uıymdarda basqarý fýnktsııalaryn oryndaıtyn adamdarǵa da qoldaný tapsyrylǵan.
Zań jobasynda Qazaqstan Respýblıkasynyń Eńbek kodeksine, «Memlekettik qyzmet týraly» jáne «Sybaılas jemqorlyqqa qarsy kúres týraly» zańdarǵa tıisti túzetýler engizý kózdelgen.
«Memlekettik qyzmet týraly» zańǵa memlekettik qyzmetshiniń jeke múddeleri men azamattardyń, memlekettiń múddeleri arasynda qaıshylyqtar týyndaıtyn nemese týyndaýy múmkin jaǵdaı - «múddeler qaqtyǵysynyń» anyqtamasy engizildi.
Tulǵalar úshin memlekettik qyzmetten bosaǵannan keıin kommertsııalyq uıymdarda jumysqa ornalasýǵa tyıym salý Eńbek kodeksinde kózdeledi.
Memlekettik qyzmetshiler úshin belgilengen shekteýler memlekettik uıymdarda jáne memlekettiń qatysý úlesi bar uıymdarda basqarý fýnktsııalaryn oryndaıtyn adamdarǵa qoldanylady. Tıisti normalar «Sybaılas jemqorlyqqa qarsy kúres týraly» zańǵa engiziledi.
Budan basqa, zań jobasymen Qazaqstan Prezıdenti Ákimshiliginiń 2009 jylǵy maýsymnyń 9-yndaǵy tapsyrmasyna sáıkes «Memlekettik qyzmet týraly» jáne «Sybaılas jemqorlyqqa qarsy kúres týraly» zańdarǵa memlekettik qyzmetke qabyldaýdan bas tartý úshin negiz bolýy múmkin kórineý jalǵan qujattar men málimetterdi kadr qyzmetine tapsyrǵan tulǵalardy jumystan bosatýdy, sybaılas jemqorlyq quqyq buzýshylyqtardyń nátıjesinde jasalǵan aktiler men is-áreketterdi mindetti túrde joıýdy jáne basqa normalardy kózdeıtin ózgerister men tolyqtyrýlar engiziledi.
Sondaı-aq zań jobasynda quqyq qoldaný praktıkasyna baılanysty birqatar kemshilikter joıylǵan.
