Sybaılas jemqorlyqqa qarsy kúres - elorda ákimdigi qyzmetiniń basym baǵyty
ASTANA. QazAqparat - Elorda ákimdiginiń qurylymdyq bólimsheleriniń basshylary úshin bıznes ókilderimen jumysty uıymdastyrý jónindegi jańa talaptar belgilendi.
Sybaılas jemqorlyqqa qarsy kúresti kúsheıtý jónindegi Vedomstvoaralyq komıssııanyń otyrysynda Astana qalasynyń ákimi Áset Isekeshev tıisti tapsyrma berdi. Otyrysqa qala ákimdiginiń barlyq qurylymdyq bólimsheleriniń, vedomstvoǵa qarasty uıymdar men vedomstvolardyń basshylary qatysty, dep habarlaıdy astana.kz.
Elorda ákimi basqarmalardyń basshylarynyń sybaılas jemqorlyqqa qarsy kúres saıasatyn júzege asyrýǵa nemquraıly qaraıtynyn atap ótip, osy baǵytta pármendi sharalar qabyldaýdy tapsyrdy.
Á. Isekeshev ákimshilik tosqaýyldardy qysqartý boıynsha jumystardy jalǵastyrýdy jáne ákimdikte kórsetiletin barlyq memlekettik qyzmetterdiń aıqyndylyǵy men jarııalylyǵyn qamtamasyz etip, taldaý júrgizýdi tapsyrdy.
Sonymen qatar, qala basshysy jer ýchaskelerin berý jáne qurylys barysynda tenderler ótkizý jáne oryndalǵan jumystar aktilerine qol qoıý kezinde sybaılas jemqorlyq táýekelderin azaıtýǵa baǵyttalǵan birqatar tapsyrmalar berdi.
Elorda ákimdigi men vedomstvoǵa qarasty qurylymdardyń ǵımarattarynyń birinshi qabattarynda beınebaqylaý kameralarymen jáne dybys jazatyn quraldarmen jabdyqtalǵan kásipkerlermen kezdesýler ótkizý úshin arnaıy orynjaılar uıymdastyrylady. Kezdesýler komıssııalardyń qatysýymen ótedi, bul basshylardyń kásipkerlermen jeke baılanysqa shyǵýyna jol bermeıdi. Ákimdiktiń barlyq qurylymdyq bólimsheleriniń basshylaryna qujatqa qol qoıý úshin kásipkerlik sýbektilerin óz kabınetterinde qabyldaýǵa tyıym salyndy. Sondaı-aq, jumystan tys ýaqytta tender jeńimpazdarymen kezdesýge tyıym salyndy.
«Qoǵamnyń memlekettik qyzmetshilerge qoıǵan moraldyq-adamgershilik talaptary joǵary», - dedi Á. Isekeshev.
Memlekettik qyzmetshiler jumystan tys ýaqytta jalpyǵa belgilengen moraldyq-etıkalyq normalardy ustanýy kerek, qoǵamǵa qarsy júris-turys jaǵdaılaryna jol berilmeýi kerek. Qala basshysy memlekettik qyzmetkerlerdiń Ádep kodeksine sáıkes tártip standarttaryn saqtaýǵa basa nazar aýdaryp, qyzmettik kólikterdi jumystan tys ýaqytta jáne jeke maqsatta paıdalanýdyń zańǵa qaıshy áreket ekendigin de eske saldy.
Astana ákimi «Astana Sý Arnasy» MKK, «Kommýnaldyq menshik qory» MKK, «Qalalyq jyljymaıtyn múlik» MKK, «Astanaenergoservıs» AQ, «Astanateplotranzıt» AQ, «Astana-REK» AQ jáne t.b. kásiporyndardyń basshylaryna da sybaılas jemqorlyqqa qarsy kúres jumystaryn kúsheıtýdi tapsyrdy.
Sybaılas jemqorlyqqa qarsy kúres zańnamasyn buzý faktileri tirkelgen jaǵdaıda, birinshi basshylar ózderi jetekshilik etetin memlekettik organ úshin jeke jaýap beretin bolady, - dedi ákim.
«Anyqtalǵan kez kelgen jaǵdaı qoǵam aldynda tutastaı ákimdiktiń bedelin túsirip, azamattardyń memlekettik organdarǵa degen senimin joǵaltady. Sondyqtan osy sharalardyń bári laýazymdy tulǵalardyń da, jalpy, memlekettik organnyń da qyzmetiniń aıqyndylyǵyn qamtamasyz etý úshin qajet»,- dedi Á. Isekeshev.
