Sybaılas jemqorlyqqa qarsy is-qımyl departamenti asa iri kólemde aqsha jymqyrdy degen kúdikpen S.Mataevty ustady
ASTANA. QazAqparat - 2016 jyly 22 aqpanda Almaty qalasy boıynsha sybaılas jemqorlyqqa qarsy is-qımyl departamenti QR QPK 128-baby negizinde bıýdjet qarajatyn asa iri kólemde jymqyrdy jáne asa iri kólemde salyq tóleýden jaltardy degen kúdikpen Seıtqazy Mataevty ustady. Bul týraly vedomstvonyń baspasóz qyzmetinen habarlady.
Eske sala keteıik, búgin Almaty qalasy boıynsha sybaılas jemqorlyqqa qarsy is-qımyl bıýrosy Aqparattandyrý jónindegi komıtet pen «Qazaqtelekom» AQ-na memlekettik saıasatty damytý men baspa basylymdaryna materıaldar jarııalaýǵa bólingen 300 mıllıon teńgeden asa qarajattyń jymqyrylǵanyn anyqtady.
Atalǵan vedomstvolar osy maqsatta «QazTAG HAA» JShS jáne «Ulttyq baspasóz klýby» qoǵamdyq birlestigimen kelisimder bekitken.
Sybaılas jemqorlyqqa qarsy is-qımyl ulttyq bıýrosynyń Almaty qalasy boıynsha departamentiniń habarlamasynda atalyp ótilgendeı, Aqparattandyrý komıteti aýdarǵan 80 mln. teńge kólemindegi jáne «Qazaqtelekom» aýdarǵan 260 mln. teńge kólemindegi qarjyny Ulttyq baspasóz klýbynyń basshysy Seıitqazy Mataev qolma-qol aqshaǵa aınaldyrdy. Sonymen qatar, tergeý anyqtaǵandaı, zańsyz kásipkerlikpen aınalysqan Mataev 1,4 mlrd. teńge somasyndaǵy qarajatty qaltasyna basty, 327 mln. teńge kólemindegi salyq tólemedi.
