Sybaılas jemqorlyqqa qarsy agenttik poıyz bıletteriniń zańsyz satylymymen kúresedi
Agenttik ókilderi "Jasyryn satyp alýshylar" kómegimen zańsyz bılet satylymdaryn anyqtady jáne beınejazbalardy jarııalady.
"Agenttikke bıletterdiń zańsyz satylymy týraly habarlar kóptep túsýde, ınternet pen áleýmettik jelide de temir jol kassalarynan bılet tabý máseleleri kóterilip jatyr. 17 shildeden bastap, Qazaqstannyń barlyq óńirinde "jasyryn satyp alýshylar" arqyly monıtorıng júrip jatyr", - dedi Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov Agenttikte ótken jınalysta.
Onyń aıtýynsha, zańsyz alypsatarlardyń bıletti anaǵurlym qymbat baǵaǵa satatyny baıaǵydan belgili.
"Jazǵy maýsymda bıletke talas bastalady jáne belgili bir adamdarǵa júginý arqyly ońaı bılet tabýǵa bolady. Biz júrgizgen monıtorıng osyny dáleldedi. Barlyq óńirde jumys istedik. Ásirese, kýrorttyq oryndarǵa aparatyn bıletter zańsyz satylyp jatyr. Mundaı zańsyz oqıǵalar Astana, Almaty jáne Aqmola oblystarynda baıqaldy. Bul óte júıeli másele", - dedi Oljas Bektenov.
Sondaı-aq, Bektenov atalǵan monıtorıng jumystarynyń aldyn alý sharalary ekenin atap ótti.
"Zańsyz alypsatarlardyń basym bóligi - jeke tulǵalar, olardyń vokzal ákimshiligimen qanshalyqty baılanys ornatqany mańyzdy bolyp otyr. Munda bireýdi ustap alyp, jazalaý maqsat emes. Bizdiń mindetimiz - qoǵamdy ashyqtyqqa shaqyrý. Qazir aldyn ala sybaılasý faktileriniń bar-joǵy týraly anyq aıta almaımyn, sebebi eshqandaı sotqa deıingi tergeý jumystary júrgizilgen joq. Biz júrgizgen jumystar aldyn alý sharalary ǵana", - dep óz sózin túıindedi Agenttik ókili.