Sybaılas jemqorlyqqa qarsy agenttik logotıpin tanystyrdy
«Fırmalyq stıl – kommýnıkatsııanyń bir túri. Fırmalyq stıldiń bolýy álemdik korporatsııanyń, bıznestiń ajyramas elementi bolyp sanalady. Damyǵan jáne damyp kele jatqan elderde vızýaldy kommýnıkatsııany memlekettik organdar da keńinen paıdalanady. Máselen, FBI jazbasy bar beısbolkalardy nemese NASA jazbasy bar jeıdelerdi kórgen bolarsyzdar. Munyń bári de aınalyp kelgende sheteldik memlekettik organdardyń vızýaldy kommýnıkatsııasynyń elementteri. Al Qazaqstanda bir ókinishtisi, ózindik kommýnıkatsııalyq brendi bar birde-bir memlekettik organ joq», - dedi Sybaılas jemqorlyqqa qarsy agenttiginiń kadrlyq jumys boıynsha basshysy Nurlan Jaqsymbetov agenttikte ótken baspasóz máslıhatynda.
Onyń aıtýyna qaraǵanda, Sybaılas jemqorlyqqa qarsy is-qımyl agenttigi osynaý trendten qalmaýdy jón kórip otyr.
«Elbasy men Prezıdent memleket pen qoǵam arasyndaǵy qashyqtyqty qysqartý, baılanysty jaqsartý mańyzdylyǵyna birneshe márte toqtalǵan bolatyn. Osy kommýnıkatsııanyń formasy da mańyzdy. Sol sebepti, Agenttik tóraǵasy atalmysh ıdeıaǵa qoldaý bildirip, Agenttiktiń fırmalyq stılin qurý bastamasyn maquldady. Sizderge jańa kommýnıkatsııalyq logotıp pen emblemany tanystyrýǵa ruqsat etińizder», - dedi Nurlan Jaqsymbetov.
