Sybaılas jemqorlyq jáne Qarjy monıtorıngi agenttikteri memorandýmǵa qol qoıdy
Qol qoıý rásimi barysynda sybaılas jemqorlyqqa qarsy qyzmettiń basshysy M. Ahmetjanov memorandýmnyń Memleket basshysynyń qylmystyq jolmen tabylǵan aktıvterdi izdeýge qatysty tikeleı tapsyrmasy – follow the money qaǵıdaty aıasynda ázirlengenin atap ótti.
Vedomstvo basshysynyń aıtýynsha, birlesken kúsh-jigerdiń shoǵyrlanýy laýazymdy tulǵalar tarapynan sybaılas jemqorlyq pen kóleńkeli bıznestiń kedergisiz áreket jasaýyna qaraılasý máselelerin sheshýge yqpal etedi. Jalpy, M. Ahmetjanovtyń pikirinshe, osy birlesken qujatty qabyldaý organdardyń aldyna qoıylǵan mindetterdi oryndaý boıynsha tyǵyz ózara is-qımyl jasaıtyn platforma bolady.
Memorandým aıasynda eki memlekettik organnyń sybaılas jemqorlyqqa jáne kóleńkeli ekonomıkaǵa qarsy is-qımyl salasyndaǵy memlekettik saıasatty iske asyrýdaǵy ózara is-qımyly, sondaı-aq sybaılas jemqorlyq pen ekonomıkalyq quqyq buzýshylyqtardyń aldyn alýǵa, anyqtaýǵa, jolyn kesýge, ashýǵa jáne tergep-tekserýge járdemdesý kózdeledi.
Bul úshin sybaılas jemqorlyq quqyq buzýshylyqtarǵa jáne kóleńkeli ekonomıkaǵa qarsy is-qımyl salasynda birlesken is-sharalar, aldyn alý sharalaryn júrgizý, jumys tájirıbesimen jáne qylmystyń jaı-kúıi, sybaılas jemqorlyq jáne ekonomıkalyq qylmystardy ashý jáne tergeý ádisteri men tásilderi týraly aqparatpen, sondaı-aq táýekelder men jasalý qaterleri týraly málimettermen almasady.
