Sybaılas jemqorlyq týraly aqparat úshin beriletin syıaqy mólsheri ulǵaıdy

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń Seriktestik departamentiniń dırektory Rasýl Medetov jemqorlyq týraly aqparat bergen adamǵa beriletin syıaqy mólsheri qalaı óskenin aıtyp berdi, dep habarlaıdy QazAqparat tilshisi.

«Bıyldan bastap sybaılas jemqorlyq boıynsha aqparat bergen adamdarǵa syıaqy mólsheri óskenin atap ótkim keledi. Buryn eń maksımaldy kórsetkishi – 250 myń teńge bolsa, qazirgi tańda habar bergen adam 10 mln 600 myń teńgege deıin syıaqy ala alady. Árıne ol fakt biraq dáleldenip, sot úkimi shyǵýy kerek», - dedi Rasýl Medetov agenttiktiń Facebook paraqshasyndaǵy suhbatta sóılegen sózinde.

Eske sala ketsek buǵan deıin Rasýl Medetov jemqorlyq týraly habar bergen adamnyń aqparaty shynaıy bolýy kerektigin málim etken edi.

«Qazaq «aýrýyn jasyrǵan óledi» deıdi. Sondyqtan árıne belgili bir jerde paraqorlyq faktisi tirkeletin bolsa ol jaıly habarlaý – bizdiń mindetimiz, azamat retinde paryzymyz. Biraq bul rette bir máselege nazar aýdartqym keledi. Ózim de óńirlerde jumys istedim. Azamattardyń keıbiri anaý jerde mynadaı, mynaý jerde anadaı paraqorlyq bolyp jatyr dep negizsiz ári dáleldenbegen aqparat berip jatady. «Qymbat kóligi bar, demek para alady» eken degen osyndaı alypqashpa sózder shyndyqqa janaspaýy da múmkin. Sondyqtan kelip túsken aqparat mindetti túrde shyn bolýy kerek», - dedi Rasýl Medetov agenttiktiń Facebook paraqshasyndaǵy suhbatta sóılegen sózinde.