Sybaılas jemqorlyq: petropavldyq Batyr ana kezekpen kútken páterin byltyr alýy kerek bolǵan

PETROPAVL. QazAqparat – Petropavlda kóp jyl kútken kezegi kelse de, páterin ala almaı júrgen Batyr ana Táýelsizdik kúni qarsańynda baspanaly boldy. Zeınetker Sybaılas jemqorlyqqa qarsy qyzmetke júgingennen keıin quqyǵy qalpyna keltirildi, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń Soltústik Qazaqstan oblysy boıynsha departamentiniń málimetinshe, Kúlzaıra Serdalınova «Altyn alqa» jáne «Batyr ana» ordenimen marapattalǵan. Óńir turǵyny quqyǵyn paıdalanyp, birneshe jyl buryn Petropavl ákimdigine baspana kezegine turǵan. Alaıda, kópten kútken kezegi kelgenimen, kóp balaly ana páterge qol jetkize almaǵan. Petropavl qalasynyń ákimdigi keıýanaǵa jańa páterdiń kiltin tek Sybaılas jemqorlyqqa qarsy qyzmettiń aralasýynan keıin ǵana tabystady.

«Kúlzaıra Serdalınovaǵa bir jarym jyl buryn, ıaǵnı 2021 jyldyń tamyzynda ótken turǵyn úı komıssııasynyń otyrysy qorytyndysy boıynsha páter berý jóninde oń sheshim shyǵarylǵany rastaldy. Mundaı faktiler júıeli sıpatqa ıe. Sybaılas jemqorlyq táýekelderin taldaý barysynda olardyń sebepteri anyqtalyp, joıý boıynsha birqatar usynymdar ázirlendi. Taldaý nátıjesi týraly tolyq málimet qosymsha habarlanatyn bolady», - delingen departament taratqan habarlamada.