Sybaılas jemqorlyq: Qyzylorda oblysynda 6 aýyl ákimi jaýapqa tartyldy
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi Qyzylorda oblysy boıynsha departamentiniń uıymdastyrýymen atalmysh taqyrypqa baılanysty jıyn ótkizildi. Oǵan Sybaılas jemqorlyqqa qarsy Ulttyq bıýronyń oblystyq departamenti, oblystyq basqarma basshylary, sondaı-aq, Qyzylorda qalasy jáne aýdan ákimderi qatysvp, oblys ákiminiń orynbasary Qýanyshbek Ysqaqov tóraǵalyq etti.
Jıyn barysynda Sybaılas jemqorlyqqa qarsy Ulttyq bıýronyń oblys boıynsha departamentiniń basqarma basshysy Baqytjan Nııazov «Jyl basynan beri oblysta 6 kent jáne aýyldyq okrýg ákimderi sybaılas jemqorlyq qylmys jasaǵan. Onyń ishinde, 3 aýyl ákimi para alǵany úshin, qalǵan 3-eýi qyzmettik jalǵandyq úshin jaýapkershilikke tartyldy. Naqty aıtqanda, Qazaly aýdanynyń Basyǵara aýyldyq okrýgi, Shıeli aýdanynyń Gıgant aýyldyq okrýgi jáne Qyzylorda qalasynyń Belkól kenti ákimderi jer telimderin berý úshin para alǵan. Al Aral aýdanynyń Jaqsyqylysh kenti jáne Jańaqorǵan aýdanynyń Shalqııa, Tómenaryq eldi mekenderiniń ákimderi qyzmettik jalǵandyq jasaǵan», - dedi.
Sonymen qatar, májilis barysynda oblystaǵy jergilikti atqarýshy memlekettik organdardaǵy sybaılas jemqorlyqtyń aldyn alýdyń ózekti problemalyq máseleleri talqylandy.