Sybaılas jemqorlyq faktisin habarlaǵan úsh almatylyq 640 myń teńge syıaqy aldy

ALMATY. QazAqparat - Sybaılas jemqorlyq faktisin nemese sybaılas jemqorlyqqa qarsy is-qımylǵa járdem kórsetken azamattarǵa yntalandyrý syılyǵy beriledi, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Almaty qalasy boıynsha departamenttiń málimetinshe, azamattardyń 1424 sall-ortalyǵyna sybaılas jemqorlyq faktileri týraly habarlaýy — sybaılas jemqorlyqqa qarsy qyzmetke senim arttyrýda erekshe ról oınaıdy.

«1424 sall-ortalyqtyń operatorlary táýlik boıy sybaılas jemqorlyq týraly habarlamalarǵa jáne bızneske jasalǵan qysymǵa jaýap beredi, shaǵymdardy, pikirlerdi qabyldaıdy, konsýltatsııalyq kómek kórsetedi» dep habarlady vedomstvoda.

Sondaı-aq departamentte habarlaǵandaı, ústimizdegi jyldyń aǵymdaǵy kezeńinde 1424 sall-ortalyǵyna 28 ótinish kelip túsken. Onyń 18-i «aqparatty esepke alý kitabynda» tirkeldi. Olar boıynsha qylmystyq jáne qylmystyq is júrgizý zańnamasy aıasynda jumys júrgizilýde.

Sonymen qatar, aǵymdaǵy jyldyń 6 aıynda sybaılas jemqorlyq faktisin habarlaǵan úsh almatylyq 640 myń teńge syıaqy aldy

Azamattardy kótermeleý aqparattyń shynaıylyǵy, sondaı-aq, zańdy kúshine engen sot úkimi bolǵan kezde ǵana júzege asyrylady.

«Syıaqy somasy sybaılas jemqorlyq quqyq buzýshylyqtyń aýyrlyǵyna baılanysty. Para nemese keltirilgen zalal somasy 1 myń AEK-ten (3 mln.063 myń teńge) aspaıtyn sybaılas jemqorlyq quqyq buzýshylyq týraly habarlama, syıaqy 30-dan 100 AEK-ke deıin quraıdy.

Kórsetilgen somadan artyq – syıaqy 10% - dy quraıdy, biraq 4 myń AEK-ten aspaıdy (12 mln 252 myń teńge)», - dep málimdedi departamentte.