Sybaılas jemqordy ustap bergender 240 myń teńge syıaqy alady

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev sybaılas jemqorlyqqa qatysty quqyq buzýshylyq týraly aqparatpen bólisken azamattar quqyqtyq qorǵaýmen qamtamasyz etiletine kepildik beriletinin málim etti. Bul týraly agenttik tóraǵasy Feısbýktegi paraqshasynda jazdy.

«Azamattyq sanalylyq - qur sóz emes. Árbir qazaqstandyq sanasyndaǵy sybaılas jemqorlyqty jeńe bilgende elimizde bul qubylysty jeńetinimizge senemin.  Árqaısysymyz qazir jáne bolashaqta sybaılastyq jemqorlyqqa oryn joq dep málim etkende, eń bastysy - árbir azamat oǵan qarsy kúrese bastaǵanda ǵana jeńis keledi.

Dostar, eger de sybaılas jemqorlyq quqyq buzýshylyqtary, ıaǵnı parany bopsalap alý nemese berý, bıýdjet qarjysyn jymqyrý jospary, laýazymdyq ókilettikterin asyra paıdalaný jaǵdaılarynyń kýágeri bolyp jatsańyzdar, tez arada agenttikke habarlasyńyzdar.

Bizdiń call-ortalyǵymyzdyń nómiri 1424. Táýlik boıy jumys jasaıdy. Meniń jeke poshtam [e-mail].

Birde bir ótinishtiń qaraýsyz qalmaıtyndyǵyna kepildik beremin. Aqparatpen bólisken azamattar qupııalylyq jáne quqyqtyq qorǵaýmen qamtamasyz etiledi.

Aqparat rastalǵan jáne sotta aıyptaý úkimi bolǵan jaǵdaıda, málimet berýshige 240 myń teńgege syıaqy beriledi», - dep jazdy Alık Shpekbaev.