Sybanbaevany óltirý kúdigine ilikken azamattyń múrdesi 26 maýsymda Esil ózeninen tabylǵan - ІІM
ASTANA. QazAqparat - Baldyrǵan Sybanbaevany óltirý kúdigine ilikken 25 jastaǵy jigittiń múrdesi aǵymdaǵy jyldyń 26 maýsymy kúni Esil ózeninen tabyldy, dep habarlaıdy QazAqparat.
«Astana qalalyq ІІD Tergeý basqarmasy azamatsha B.N.Sybanbaevanyń iz-tússiz joǵalý faktisine oraı QR QK-iniń «Kisi óltirý» 99-baby 1-bóligi boıynsha sotqa deıingi tergeý bastaǵan bolatyn. Tergeý júrgizý barysynda kúdikti azamat B-nyń atalǵan qylmysty jasaǵandyǵy dáleldengen. Kúdiktiniń múrdesi 2016 jylǵy 26 maýsymda Esil ózeninen tabyldy», - dedi QR ІІM Memlekettik til jáne aqparat departamentiniń dırektory Almas Sadýbaev QazAqparat tilshisine.
Onyń aıtýynsha, bul qylmystyq is Esil aýdandyq ІІB Sotqa deıingi tergeýdiń biryńǵaı tiziliminde tirkelgen.
«Astana qalalyq ishki ister departamenti atalǵan qylmystyq is boıynsha oqıǵanyń mán-jaıyn obektıvti tergeý baǵyttalǵan qajetti jedel tergeý sharalaryn júrgizýde», - dedi Sadýbaev.
Esterińize sala keteıik, 28 maýsymda Astana qalalyq ishki ister departamentiniń polıtseıleri azamatsha Sybanbaevany óltirýi múmkin kúdiktini anyqtaǵandyǵy jarııalanǵan bolatyn. Al 26 maýsymda qalalyq ІІD Prıgorodnyı kentiniń janyndaǵy aǵashtardyń arasynda osyǵan deıin iz-tússiz joǵalyp ketken azamatsha Sybanbaevanyń zorlyq belgileri bar máıiti tapqan edi.
Aıta keterligi, 19 maýsymda Astana qalasy aýmaqtyq ІІB kezekshi bólimine 18 maýsymda saǵat 03:00-de týysy Baldyrǵan Sybanbaeva «Retro» túngi klýbynan shyǵyp ketip, sodan qaıtyp oralmaǵany jaıly shaǵymdanǵan.
