«Sybaǵa» baǵdarlamasy qaıta jańǵyrtyldy
«Elbasy tapsyrmasyna sáıkes aýyl sharýashylyǵy salasynda eńbek ónimdiligi men ónim eksporty kólemin 2,5 esege ulǵaıtý mindeti qoıyldy. Bul oraıda Aýyl sharýashylyǵy mınıstrligi 2018-2027 jyldarǵa arnalǵan mal sharýashylyǵyn damytýdyń salalyq baǵdarlamasyn ázirlep, otandyq ónimniń eksporttyq áleýetin arttyrýdy qarastyrdy. Osy turǵyda bizdiń qor bıyl «Sybaǵa» baǵdarlamasyn jańartyp, nesıeleýdi bastady», - dedi Aýyl sharýashylyǵyn qarjylaı qoldaý qorynyń basqarma tóraǵasy Jandar Omarov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, nesıe etti baǵyttaǵy iri qara jáne usaq múıizdi mal basyn satyp alýǵa baǵyttalǵan.
Erekshelikterine toqtalsaq, birinshiden, buryn atalǵan baǵdarlama boıynsha 30 mln teńgege deıin nesıe alý múmkin bolsa, búginde onyń kólemi 70 mln teńgege jetti. Ekinshiden, nesıeni óteý merzimi 7 jyldan 15 jylǵa deıin uzartylsa, odan bólek, ústemaqy kólemi 4% deıin azaıtyldy.
«Tuqymdy maldy shetelden ákeletin sharýashylyqtar memleketten qosymsha ár maldyń basyna 225 myń teńge sýbsıdııa alý qarastyrylǵan. Jáne paıyzdyq ústemeni 14%-dan 4%-ǵa deıin sýbsıdııalaý arqyly azaıta alady. Oǵan qosa, jas maldy bordaqylaý alańyna tapsyrǵan kezde tiri salmaqtyń ár kelisine 200 teńgeden sýbsıdııa ala alady. Kelesi kepildik boıysha alynǵan nesıeniń 75%-na deıin satyp alynatyn mal men tehnıkany kepildikke qoıa alady», - dedi ol.
Ústimizdegi jyly «Sybaǵa» baǵdarlamasy boıynsha jalpy somasy 14 mlrd-tan astam teńgege 627 nesıe qarjylandyryldy. Ol boıynsha elimizge 22 myńǵa jýyq iri qara jáne 70 myńǵa jýyq usaq mal basy ákelindi.
«Aldaǵy jyldyń josparymen bólissek, «QazAgro» holdıngi óziniń enshiles kompanııalary arqyly 100 myńnan astam bas iri qara mal satyp alý qaralýda. ıAǵnı jospar bıylǵy jylmen salystyrǵanda 2 esege artyq oryndalǵaly tur. Taǵy bir másele baǵdarlama boıynsha iri sharýashylyq qojalyqtaryn emes, shaǵyn otbasylyq fermalardy damytýǵa basa nazar aýdarylady»,- dedi J.Omarov.
