Swatch shveıtsarııalyq kompanııasynyń saǵattary joǵalǵan kalorııdiń sanyn sanaıtyn bolady
ASTANA. QazAqparat - Shveıtsarııalyq Swatch Group kelesi jyly iri tehnologııalyq kompanııalardyń gadjetterimen básekelese alatyn «aqyldy saǵattar» (smartwatches) shyǵarýǵa bel býǵanyn málim etti. Mundaı jabdyqtardyń naryǵy $93 mlrd-qa baǵalanǵan, dep habarlady RBK.
Swatch saǵat shyǵaratyn álemdegi iri kompanııalardyń biri. Ol 2015 jyldyń jazynda óziniń Swatch Touch modelin jurtshylyqqa usynýdy josparlap otyr.
Swatch bas dırektory Nık Haıek jańa saǵattar onyń ıesi qansha adym jasaǵanyn jáne qansha kalorııdi joıǵanyn eseptep bere alatynyn jetkizdi. Haıek suhbattarynyń birinde saǵatta Bluetooth-y bar taǵy birneshe qyzyqty fýnktsııa bolatynyn aıtty. «Barlyq iri tehnologııalyq kompanııalar bizben jumys istegisi keledi. Olarmen keı salada seriktes bola alamyz. Alaıda biz ózimiz de talaı sharýany atqara alamyz», - dedi Swatch Group bas dırektory.
