Svetlana Jolmanova sot otyrysyna sońǵy sózin aıtýǵa kelgen joq
ALMATY. KAZINFORM — Medeý aýdandyq sotynyń burynǵy sýdıasy Svetlana Jolmanova sońǵy sózin aıtýǵa sot otyrysyna kelmedi.
Sot onyń qatysýynsyz isti qaraýdy jalǵastyrdy.
— Sot taraptardyń pikirin tyńdap, sottalýshy Svetlana Jolmanovanyń qatysýynsyz sot otyrysyn jalǵastyrý týraly sheshim qabyldady, sebebi ol óz quqyǵyn paıdalana otyryp, sot otyrysyna qatysýdan bas tartty. Búgin sottalýshylarǵa sońǵy sóz beriled, — dedi sýdıa Árinov.
Sotta sońǵy sózdi tek ekinshi aıyptalýshy D. Kúshalıev aıtty. Ol sottan bas bostandyǵynan aıyrmaý jazasyn taǵaıyndaýdy surady.
— Men Jolmanova men jábirlenýshiler arasynda deldal bolǵanymdy aıttym. Men barlyq shyǵyndy ótedim, jábirlenýshilerdiń maǵan qoıatyn talaptary joq. Qylmystyq kodeksiniń 53-babyna sáıkes, «zalaldyń tolyq ótelýi jaza taǵaıyndaý kezinde eskerilýi tıis mán-jaılardyń biri». Meniń qaıtalanǵan qylmysym óteldi. Prokýratýranyń qylmystyń qaıtalanýyn qoldanýy qate dep esepteımin, memlekettik aıyptaýshy isti durys saralamaǵan. Meniń áreketimdi Qazaqstan Respýblıkasy Qylmystyq kodeksiniń 190-babynyń 4-bóliginiń 3-bóligine sáıkes qaıta saralaýyn suraımyn, ıaǵnı is qozǵalǵan kezde men jábirlenýshilerge 6 mln 650 myń teńge qaıtaryp berdim. Іs qozǵalǵan kezde keltirilgen shyǵyn 9 mıllıon 950 myń teńge bolǵan. Osyny eskerip, ádil sheshim shyǵarýyńyzdy suraımyn, — dedi sottalýshy Kúshalıev.
Sot sheshim qabyldaý úshin keńesý bólmesine ketti. Kelesi otyrysta sot úkimi shyǵady.
Svetlana Jolmanova 2021 jyldan bastap 2024 jylǵa deıin jyljymaıtyn múlik satyp alýǵa jáne tenderlik jobalarǵa qatysýǵa járdemdesý syltaýymen, aldaý jáne senimge qııanat jasaý arqyly azamattardyń mıllıondaǵan teńgesin qoldy qylǵan. Zardap shekkenderdiń arasynda onyń dostary, kórshileri, tanystary men áriptesteri bar.
Tergep-tekserý barysynda qylmystyq árekettiń 48 epızody anyqtalyp, olar bir iske biriktirildi.
Buǵan deıin prokýror Raýshan Abdýlla aıyptaý aktisin oqyǵan bolatyn.
Eske salaıyq, osyǵan deıin sottalýshy Svetlana Jolmanovaǵa qatysty sot otyrysy bes ret keıinge shegerilgen bolatyn.
Buǵan deıin Bas prokýratýra Jolmanovanyń isi sotqa joldanǵany týraly habarlaǵan bolatyn.
Eske salaıyq, byltyr eks-sýdıasy Svetlana Jolmanova ustalǵany týraly jazǵanbyz.
Alǵash ret almatylyq sýdıa 2021 jyly alaıaqtyq jasady degen kúdikke ilingen.