Svetlana Jaqypova: Jastar shetelge jalaqy az bolǵandyqtan ketip jatqan joq
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova joǵary bilimi bolsa da shetelde qara jumys istep júrgen qazaqstandyq jastar týraly pikir bildirdi.
«Qazaqstan jyl saıyn sheteldik jumys kúshine 20 myńnan astam kvota bólip keledi. Soǵan qaramastan óz azamattarymyz Ulybrıtanııaǵa baryp qarǵa úrkitip, Ońtústik Koreıaǵa baryp qara jumys istep júr. Muny Eńbek mınıstrligi qalaı baǵalaıdy? Qalypty jaǵdaı ma, álde eńbek qatynastary rettelmegeniniń kórinisi me?» - dep surady jýrnalıst.
Mınıstr muny qalypty jaǵdaı dep qabyldaıtynyn aıtty.
«Biz muny problema dep qabyldamaımyz. Negizi ár azamat qaı jerde jumys istese de quqyly. Shekteý jasamaımyz. Qazaqstan jastaryna shekteý qoımaımyz. Bizdiń basty maqsatymyz – eńbek naryǵynda jaǵdaı jasaý. Jańa jumys oryndary sapaly bolsa, sonda qazaqstandyq jastar Qazaqstanda qalady. Jastar shetelge jalaqy az bolǵandyqtan ketip otyr dep aıtýǵa bolmaıtyn shyǵar. Men sizge óz basymdaǵy jaǵdaıdy aıtaıyn. Meniń jaqyn týysymnyń balasy joǵary oqý ornyn bitirgenine qaramastan, Ulybrıtanııaǵa siz aıtyp otyrǵandaı plantatsııada jumys isteýge ketti. Bárimiz narazy boldyq. «Áke-shesheńdi tastap qalaı Ulybrıtanııaǵa ketip barasyń?» - dedik. «Joq, men el kórem» dep ketti. Qazir sol elde jarty jyldyń ishinde oqýǵa tústi. Sony bitirgen soń elge oralmaqshy. Sondyqtan eki kórinis. Sol jaqta bilim alyp, eldiń ózgerýine úles qossa, tamasha bolady. Al eger «Qazaqstannan múldem ketem, unamaıdy», - degen, endi oǵan biz narazymyz. Mysaly sizderge tanystyrǵan elektrondy eńbek bırjasyndaǵy sapaly jumystardyń sanyn 2 mıllıonnan 3,8 mıllıonǵa deıin jetkizemiz. Ol degen aılyǵy medıanalyq jalaqydan, ıaǵnı, 350 myń teńgeden kem emes jumys degen sóz», - dedi Svetlana Jaqypova.
