Svetlana Jaqypova: Jasandy zeıin ákimderdiń jumysyndaǵy kemshilikterdi áshkereleı alady
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova Úkimettiń kóshpeli otyrysynda ákimdikterdiń jumysyndaǵy kemshilikti jasandy zeıin arqyly qalaı anyqtaýǵa bolatynyn kórsetti.
Svetlana Jaqypova Rıdder qalasynyń mysalynda ákimdikterdiń jumysyndaǵy olqylyqtardy jasandy zeıin qalaı áshkerelep otyratynyn aıtty.
- Jasandy zeıin táýekel aımaqtarynyń faktorlaryn da anyqtaıdy. Mysaly Rıdderde kirisi joq 141 otbasy bar. Ákimder osy faktorlarmen naqty jeke jumys isteýi kerek. Baspanasyz otbasylardyń sany – 166. Ár sannyń artynda belgili bir otbasy tur. Sondaı-aq, Rıdderde otbasylardyń basym bóliginde zeınetaqy jarnalaryn tóleýshi joq ekenin kórýge bolady. Bul beıresmı sektorda jumyssyzdyqtyń deńgeıi joǵary ekenin aıtyp turǵan bolýy múmkin. Bul ákimge qaı baǵyttaǵy jumysty jetildirý kerektigin kórsetedi, - dedi vedomstvo basshysy.
Buǵan deıin Úkimet basshysy Oljas Bektenov jasandy ıntellektiniń kómegimen tsıfrlyq sheshimderdi ıntegratsııalaý qajettigin aıtty.