Svetlana Jaqypova sýbsıdııalanatyn jumys oryndaryna qatysty problemalardy atady

ASTANA. KAZINFORM – Atalǵan másele týraly Eńbek jáne halyqty áleýmettik qorǵaý mınıstri Svetlana Jaqypova ÚEU ókilderimen áleýmettik-eńbek salasyn damytý máselelerin talqylaý barysynda aıtty.

Onyń sózinshe, sýbsıdııalanatyn jumys oryndarynyń barlyq túrlerin iske asyrý kezinde bıýdjet qarajatyn jymqyrý jáne tıimsiz paıdalaný faktileri anyqtalǵan.

«Bıýdjet qarajaty tek maqsatty túrde jumsalýy tıis. Sýbsıdııalanatyn jumys oryndary – bul jumys berýshilerdi qoldaý emes, halyqtyń áleýmettik osal toptardaǵy jumyssyz azamattarǵa qoldaý kórsetý quraly ekenin túsinetin ýaqyt jetti. Osy sebepti mınıstrlik olardy uıymdastyrý sharttaryn qaıta qarastyrdy. Endi bul protsess tolyqtaı avtomattandyrylady. Jumys berýshiler turaqty jumyspen qamtýdy qamtamasyz etýge mindetti bolady, sondaı-aq jumys oryndaryn qurý lımıti – kásiporyndaǵy jumyskerlerdiń jalpy sanynyń 10%-ynan aspaýy tıis. Eger jumys berýshiler memlekettik qoldaýdyń basqa da túrlerin alyp otyrsa, olar sýbsıdııalanatyn jumys oryndaryn uıymdastyrýǵa qatysa almaıdy. Bul jańashyldyqtar sýbsıdııalanatyn jumys oryndarynyń tıimdiligin arttyrýǵa, turaqty jumyspen qamtýǵa jáne bıýdjet qarajatynyń maqsatty jumsalýyna baǵyttalǵan», – dedi mınıstr.

Sýbsıdııalanatyn jumys oryndaryn uıymdastyrýǵa ÚEU-nyń qatysý úlesi – 2,8%-dy quraıdy. 2024 jyly barlyǵy 66 myńǵa jýyq shart jasalǵan bolsa, onyń 1 817-si – ÚEU. Jalpy 188 myńnan astam adam, onyń ishinde ÚEU arqyly – 6,5 myń adam nemese 3,5% jumyspen qamtyldy.

Aıta keteıik, osyǵan deıin QR Eńbek jáne halyqty áleýmettik qorǵaý mınıstri Svetlana Jaqypova úkimettik emes uıymdardyń ókilderimen kezdesý ótkizdi.

Osyǵan deıin Svetlana Jaqypova áleýmettik qyzmetterdi lıtsenzııalaý kezinde anyqtalǵan kemshilikterdi ataǵan bolatyn.