Svetlana Jaqypova Eńbek jáne halyqty áleýmettik qorǵaý mınıstri laýazymynan bosatyldy
ASTANA. KAZINFORM – Svetlana Jaqypova Qazaqstan Respýblıkasynyń Eńbek jáne halyqty áleýmettik qorǵaý mınıstri laýazymynan ketti. Bul týraly Aqordanyń baspasóz qyzmeti habarlady.
– Memleket basshysynyń Jarlyǵymen Svetlana Qabykenqyzy Jaqypova Qazaqstan Respýblıkasynyń Eńbek jáne halyqty áleýmettik qorǵaý mınıstri laýazymynan bosatyldy, - delingen habarlamada.
Svetlana Jaqypova 1968 jyly Qaraǵandy oblysynda dúnıege kelgen. Tselınograd memlekettik pedagogıkalyq ınstıtýtyn, Almaty ekonomıka jáne statıstıka akademııasyn támamdaǵan. Eńbek jolyn 1984 jyly Qaraǵandy oblysy Qaroı orta mektebiniń muǵalimi bolyp bastaǵan.
1991-1995 jyldary Tselınograd qalasyndaǵy orta mektepte matematıka pániniń muǵalimi bolǵan.
1997-2008 jyldary «Zeınetaqy tóleý jónindegi ortalyǵy» respýblıkalyq memlekettik qazynalyq kásipornynyń aǵa mamany, bas mamany, bólim meńgerýshisi, dırektordyń orynbasary, dırektory laýazymdarynda jumys istegen.
2008-2011 jyldar aralyǵynda Eńbek jáne halyqty áleýmettik qorǵaý mınıstriliginiń Áleýmettik qorǵaý jáne áleýmettik saqtandyrý departamentiniń dırektory laýazymynda qyzmet atqarǵan.
2011-2013 jyldary «Ulttyq aqparattyq tehnologııalar» aktsıonerlik qoǵamynyń Jobalyq ofısi baǵdarlamasyn basqarǵan. 2013-2019 jyldary Eńbek jáne halyqty áleýmettik qorǵaý mınıstriniń orynbasary bolǵan.
2020-2023 jyldar aralyǵynda BUU Damý baǵdarlamasynyń Áleýmettik damý máseleleri jónindegi Ulttyq sarapshysy qyzmetin atqardy.
2020 jyly Eńbek jáne halyqty áleýmettik qorǵaý mınıstrligi Áleýmettik saqtandyrý memlekettik qory bas dırektorynyń orynbasary laýazymyna taǵaıyndalǵan.
2023 jylǵy maýsymnan bastap, qyrkúıek aıyna deıin Qazaqstan Respýblıkasy Prezıdenti janyndaǵy Halyqtyń áleýmettik jaǵynan osal sanattarynyń quqyqtary jónindegi ýákil boldy.
2023 jyldyń 2 qyrkúıekten bastap Qazaqstan Respýblıkasynyń Eńbek jáne halyqty áleýmettik qorǵaý mınıstri qyzmetin atqardy.
Eske sala keteıik, buǵan deıin Memleket basshysynyń Izraıl prezıdenti Itshak Gertsogqa Halyqaralyq Holokost qurbandaryn eske alý kúnine oraı jedelhat joldaǵanyn jazǵan edik.