Svetlana Jaqypova eń tómengi jalaqyny kóterý máselesine qatysty pikir bildirdi
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova eń tómengi jalaqyny kóterý máselesine qatysty pikir bildirdi.
Búgin Parlament palatalarynyń birlesken otyrysy aıasynda BAQ ókilderiniń saýalyna jaýap bergen ol eń tómengi jalaqyny esepteý ádistemesi ázirlengenin atap ótti. Esepteý barysynda eńbek ónimdiliginiń kórsetkishteri, medıandy jalaqy jáne ınflıatsııa esepke alynady
- Zertteýler eń aldymen derekterdi jınaýdy kózdeıdi. Kemimeli kórsetkish durys quram qalyptastyrý, esepteýlerdi durys júrgizý úshin qajet. Búginde bul úsh ınstıtýt tarapynan qolǵa alynǵan. Jumys áli aıaqtalǵan joq. Soǵan oraı sheshim de qabyldanbady. Degenmen buǵan deıin Jumanǵarın myrza (Premer-mınıstrdiń orynbasary – Ulttyq ekonomıka mınıstri) respýblıkalyq bıýdjette 2026 jylǵa arnalǵan eń tómengi jalaqy mólsheri 85 myń teńge bolyp bekitilgenin aıtqan edi, - dedi mınıstr.
Osy oraıda BAQ ókilderi eń tómengi jalaqynyń 2027 jyly artý múmkindigin suraǵan bolatyn.
- Aıta almaımyn. Ózderińiz de biletindeı, bul – makroekonomıkalyq kórsetkish. Qazirgi ýaqytta mınıstrlik eń tómengi jalaqy qandaı bolýy kerektigin durys esepteý jáne jumys tobyna sheshim qabyldaýǵa usyný úshin jumys istep jatyr. Taǵy da atap ótkim keledi, eń tómengi jalaqy aılyq kórsetkishi emes, makroekonomıkalyq kórsetkish sanalady. Eń tómengi jalaqy biliktiligi tómen, bilimi, quzireti, daǵdysy joq mamandarǵa tólenedi. Al joǵary jalaqy alý úshin, ózińdi eń tómengi zeınetaqymen qamtamasyz etý úshin ómir boıy bilim jetildirip, jumys isteý qajet, - dedi Svetlana Jaqypova.
Aıta keteıik, búgin segizinshi saılanǵan Parlamenttiń tórtinshi sessııasy resmı túrde ashyldy.