Svetlana Podobedova bapkerlikke aýyspaqshy
ASTANA. QazAqparat - Olımpıada chempıony Svetlana Podobedova bapkerlik qyzmetpen aınalysýdy qalaıdy. Onyń aıtýynsha, Qazaqstannyń aýyr atletteri áli talaı belesterdi baǵyndyrady, dep habarlaıdy QazAqparat tilshisi.
«Qazirgi kezde bári jaqsy. Buǵan deıingi qıyndyqtardyń barlyǵy artta qaldy. Ony da aman-esen eńseremiz dep oılaımyn. Meniń ulttyq quramamen qarym-qatynasym jaqsy. Aldaǵy ýaqytta jumysqa shyǵýdy josparlap otyrmyn. Ázirshe, dekrette júrmin. Ulym áli jeti aılyq. Bir jarym jasqa kelgende bapkerlikpen aınalysamyn degen jospar bar», - dedi S.Podobedova QazAqparat tilshisine bergen suhbatynda.
Onyń aıtýynsha, ulttyq quramanyń qazirgi daıyndyǵy jaqsy. Jas sportshylar kóp. Olardyń bári Tokıo Olımpıadasyna deıin babyna kelýi tıis. «Menińshe, eki jyldan keıin olar babyna kelip, naǵyz «ózimizdiń chempıondar» bolady (kúldi). Buny bári qalaıdy ǵoı. Ózimizdiń chempıondarymyz óz jerimizde týǵan sportshylar bolsa eken dep tileıdi. Bári jaqsy bolady», - dep atap kórsetti S.Podobedova.
Aıta keteıik, Svetlana Podobedova Reseı Federatsııasynda dúnıege kelgen. Sol jerde sporttyń mansabyn bastap, eki dúrkin Eýropa chempıony, odan keıin jastar arasynda Álem chempıony atanǵan bolatyn. Alaıda dopıng synamasy úshin dıskvalıfıkatsııaǵa ushyrady. Osydan keıin S.Podobedova Qazaqstan quramasyna aýysty. Biraq Reseıdiń aýyr atletıka federatsııasy qarsylyq bildirdi. Sonyń saldarynan sportshy Beıjiń Olımpıadasyna qatysa almady. Al Qazaqstan quramasy sapynda resmı túrde óner kórsetýge ruqsat alǵannan keıin S.Podobedova eki jyl qatarynan Álem chempıony boldy.
2012 jyly London Olımpıadasyna qatysyp, altyn medaldi jeńip aldy. Tórt jyldan keıin Halyqaralyq Olımpıada komıteti ony barlyq jarystardan shettetip tastady. Sebebi London Olımpıadasy kezindegi dopıng synamadan stanozolol degen steroıdti preparat tabyldy. Osydan keıin S.Podobedova Rıo Olımpıadasyna bara almady. Tergeýden keıin HOK ony altyn medaldi qaıtarýǵa mindettedi. Alaıda qazaqstandyq sportshy júldeni qaıtarmaıtynyn málimdedi. «Men medaldi qaıtarmaımyn. Ol úshin talaı ter tóktim, jattyǵý zalynan shyqpaı, eńbek ettim. Al jeńis tuǵyryna kóterilgende menimen birge búkil Qazaqstan halqy qýandy. Sol sebepti bul - meniń ǵana emes, barsha halqymnyń medali. Ony ne úshin qaıtaramyz? Barlyq sportshylardy Olımpıadaǵa deıin de, keıin de tekserdi. Sosyn tórt jyldan keıin kelip, bizge dopıng tabyldy dep otyr. Ol ýaqyttyń ishinde ne bolǵanyn eshkim bilmeıdi», - dedi S.Podobedova.
