Svetlana Podobedova aýyr atletıkadan álem chempıonatynda kúmis júldeni qanaǵat tutty
ASTANA. 11 qarasha. QazAqparat - Qazaqstan sportshysy Svetlana Podobedova Parıjde ótip jatqan aýyr atletıkadan álem chempıonatynda kúmis júldeni qanjyǵasyna baılady.
75 kelige deıingi salmaq sanatynda jarys jolyna shyqqan qazaqstandyq aýyr atlet eki saıystyń qorytyndysy boıynsha 287 kelini baǵyndyryp, kúmis júldege ıe boldy. Julqa kóterýde 131 kelini baǵyndyrǵan ol osy saıystyń kishi altyn medalin, al serpe kóterýde 156 kelini kóterip kishi kúmis medalin qanjyǵasyna baılady. Eki saıystyń qorytyndysy boıynsha úlken altyn medal 293 kelini kótergen reseılik sportshy Nadejda Evstıýhınaǵa, al qola medal koreılik Kım ıÝn Jý-ǵa buıyrdy. Osy salmaq sanatynda óner kórsetken Qazaqstannyń taǵy bir sportshysy Anna Nurmahambetova 7-shi orynǵa taban tiredi.
Aıta keteıik, álemdik dodaǵa Olımpıada jeńimpazy Ilıa Ilın men jas daryn Almas Óteshev 94 keli salmaq boıynsha qatysady. Al Álem chempıony Vladımır Sedov 105 kelide baq synaıdy. Sondaı-aq 105 kelide Sergeı Istomın óz kúshin áıgilemek. 85 kelide Vladımır Kýznetsov, 105 keliden joǵary salmaqta Dmıtrıı Kaplın men Aleksandr Zaıchıkov syndy ziltemirshilerge senim artylyp otyr.
Parıj qalasyndaǵy aýyr atletıkadan ótetin álem chempıonatynyń tartysty básekelerin Qazaqstannyń «Elarnasy» jáne «Eýrosport» telearnalary kórsetýde.
Esterińizge sala keteıik, 6 qarasha kúni jarys jolyna shyqqan Qazaqstan sportshysy Zúlfııa Chınshanlo 53 keli salmaq sanatynda julqa kóterýde de, serpe kóterýde de eń úzdik sportshy ekenin dáleldep, qossaıys nátıjesinde álemniń eki dúrkin chempıony atanǵan bolatyn. Zúlfııa Chınshanlo 2009 jylǵy álem chempıony, Gýanchjoýda ótken Azııa oıyndarynyń kúmis júldegeri, Qazaqstannyń úsh dúrkin chempıony.
Al 63 keli salmaq sanatynda jarys jolyna shyqqan M.Maneza julqa kóterýde 109 kelini baǵyndyryp kishi qola medalǵa, al serpe kóterýde 139 kelini eńserip kishi altyn medalǵa ıe boldy. Eki saıystyń qorytyndysynda úlken kúmis medaldy qanjyǵasyna baılady. Ókinishtisi, serpe kóterý saıysynda 147 kelige tapsyrys bergen qazaqstandyq sportshy ony erkin eńsergenimen, tóreshiler taraby esepke almaı qoıdy. Al osy salmaq sanatynda álem chempıony atanǵan reseılik Svetlana Tsarýkaeva julqa kóterýde 117 kelini baǵyndyryp, álem rekordyn jańartty. Este bolsa, dál osy sportshy 2009 jyly Ońtústik Koreıanyń Koıan qalasynda ótken álem chempıonatynda M.Manezamen birdeı salmaqty baǵyndyrǵanymen óz salmaǵynyń bizdiń sportshydan sál aýyr bolýyna baılanysty kúmis júldeni qanaǵat tutqan bolatyn.
Al 69 keli boıynsha jarys jolyna shyqqan Irına Nekrasova 9-shy, Jazıra Japarqul 17-shi orynǵa turaqtaǵan bolatyn.
Álem chempıonaty 13 qarasha kúni aıaqtalady.
