Suzuki Úndistanda sıyr tezeginen bıogaz óndirýdi qolǵa aldy

ASTANA. KAZINFORM – Japonııanyń Suzuki Motor Corporation kompanııasy Úndistanda bıogaz óndirisin keńeıtý maqsatynda taǵy jeti zaýyt salýdy josparlap otyr. Bul týraly Kyodo agenttigi jazdy.

Joba parnıktik gazdar shyǵaryndylaryn azaıtyp qana qoımaı, jergilikti fermerlerdiń tabysyn arttyrýǵa baǵyttalǵan. Naýryz aıynyń ortasynda kompanııa jýrnalısterge Gýdjarat shtatyndaǵy Bhýkhal aýylynda ornalasqan bıogaz qondyrǵysyn tanystyrdy. Munda sıyr tezegi shamamen bir aı boıy arnaıy rezervýarlarda ashytylady, keıin alynǵan gaz tazartylyp, jaqyn mańdaǵy janarmaı quıý stantsııasyna jetkiziledi. Al óńdeý nátıjesinde alynǵan qaldyq organıkalyq tyńaıtqysh retinde satylady.

Qondyrǵynyń qýaty táýligine 100 tonnaǵa deıin tezek óńdeýge jetedi. Bul shamamen 1,5 tonna bıogaz óndirýge múmkindik berip, kúnine 850-ge jýyq avtokólikti otynmen qamtamasyz etedi.

Kompanııa jergilikti fermerlerden tezekti kılogramyna bir rýpııden satyp alady. Nátıjesinde árbir sharýashylyq jylyna orta eseppen 72 myń rýpıı (shamamen 775 dollar) tabys tabady.

Bıogaz syǵylǵan tabıǵı gazben (CNG) júretin avtokólikterge otyn retinde paıdalanylady. Mundaı kólikter benzınmen júretinderge qaraǵanda kómirqyshqyl gazyn az bóledi jáne Úndistan avtonaryǵynyń shamamen 20 paıyzyn quraıdy. Sonymen qatar tezekti óńdeý tabıǵı jaǵdaıda ydyraý kezinde bólinetin metan shyǵaryndylaryn da azaıtady.

Úndistanda iri qara mal sany shamamen 300 mln basqa jetedi. Indýızmde sıyr qasıetti janýar sanalǵandyqtan, el mundaı jobalar úshin asa mol shıkizat kózine ıe.

Eske sala keteıik, japonııalyq Nissan 2027 jylǵa qaraı óz modelderiniń 90%-yna JI-avtopılot engizedi.