Suıytylǵan munaı gazy eksportyna tyıym salynbaq

ASTANA. QazAqparat – Energetıka mınıstrligi suıytylǵan gazdy buıryq kúshine engen kúnnen bastap alty aı merzimge avtomobılmen jáne temir jol kóligimen áketýge tyıym salý týraly buıryqtyń jobasyn ázirledi, dep habarlaıdy QazAqparat.

Energetıka mınıstrligi buıryq jobasy ashyq NQA portalynda talqylaý úshin jarııalanǵanyn málim etti.

Qazaqstanda suıytylǵan munaı gazynyń bólshek saýda baǵalaryn memlekettik retteý engizilgen, sonyń nátıjesinde halyq jáne kóptegen ónerkásiptik kásiporyndary osy otyn túrine tez aýysyp jatqanyn baıqaýǵa bolady.

Máselen, 2022 jyly ishki naryqta tutyný 2021 jylmen salystyrǵanda 28%-ǵa ósti. Sonymen qatar 2023 jyldyń 6 aıynda tutyný ósimi ótken jyldyń sáıkes kezeńimen salystyrǵanda shamamen 100 000 tonna boldy.

Іshki naryqtyń qajettiligi 130-140 myń tonna (ákimdikterdiń ótinishterine sáıkes) bolǵan kezde Energetıka mınıstrligi maýsymǵa baılanysty aıyna jetkizý jospary sheńberinde 120-130 000 tonna nemese suranystyń 90% úlestiredi. Óndirýshi zaýyttardyń josparly jáne jospardan tys jóndeý jumystary kezeńinde ishki naryqtyń suıytylǵan munaı gazyna degen qajettiliginiń ótelmeýi 15-25% bolǵan.

Joǵaryda baıandalǵannyń negizinde jáne Qazaqstan Respýblıkasynyń ishki naryǵynda suıytylǵan gazdyń áleýmettik mańyzyn nazarǵa ala otyryp, onyń eksportyna tyıym salýdy engizý josparlanyp jatyr.

Buǵan deıin Energetıka mınıstriniń 2020 jylǵy 7 qazandaǵy №347 buıryǵymen suıytylǵan gazdy avtomobıl kóligimen úsh jyl merzimge eksportqa shyǵarýǵa tyıym salynǵan bolatyn.