Suıytylǵan gazdy satý jyl sońyna deıin elektrondy saýda alańyna tolyq kóshiriledi - mınıstrlik
«2018 jyly baǵa belgileýdi yryqtandyrý týraly sheshim qabyldandy, osyǵan baılanysty «Gaz jáne gazben jabdyqtaý týraly» QR Zańyna sáıkes 2019 jyldyń basynan bastap saýda elektrondy saýda alańdary arqyly júrgizile bastaldy. Osylaısha, bólý tártibin jáne shekti baǵalardy belgileýdi memlekettik retteýden suıytylǵan munaı gazynyń ishki naryǵyn toltyrýdyń jáne óńdeýshi kásiporyndar men tutynýshylardyń múddeleriniń balansyn qurýdyń naryqtyq ádisterine kezeń-kezeńmen kóshý júzege asyrylýda», - dedi M. Jórebekov.
Onyń aıtýynsha, búgingi tańda suıytylǵan munaı gazynyń ishki naryqqa elektrondy saýda alańy arqyly satylatyn úlesi ishki naryqta tutynýdyń 70% quraıdy.
«Biz 2019 jyly 5 paıyzdan bastadyq, qazir 70 paıyzǵa jetti. Suıytylǵan munaı gazy osy elektrondy saýda boıynsha suranys pen usynysty eskere otyryp, básekege qabiletti baǵamen satylady. Zańnama talaptaryna sáıkes, toptyq rezervýarly qondyrǵylar men munaı-hımııa kásiporyndary arqyly turǵyndardyń qajettilikteri úshin suıytylǵan gazdy satýdy qospaǵanda, aǵymdaǵy jyldyń sońyna deıin elektrondy saýda alańyna tolyq kóshý kútilýde», - dedi vıtse-mınıstr.
Onyń sózine qaraǵanda, bıylǵy qarasha aıyndaǵy ortasha kóterme baǵa tonnasyna 151 myń teńge deńgeıinde qalyptasty.
«Qalǵan 30 paıyzy ishki naryqqa QQS-pen 43 345 teńge/tonna retteletin baǵamen taratylady. Respýblıka boıynsha ortasha bólshek saýda baǵasy 99 teńge/lıtr jáne aımaqqa baılanysty 70-120 teńge/lıtr aralyǵynda aýytqıdy. Óz kezeginde, QR Básekelestikti qorǵaý jáne damytý agenttigi óz quzyreti sheginde baǵa belgileýdiń negizdiligin baqylaýdy júzege asyratynyn habarlaımyz. Mınıstrlik óz quzyreti sheginde problemalyq máselelerge monıtorıng júrgizedi jáne óńirlerdi suıytylǵan gazben turaqty qamtamasyz etý boıynsha sharalar qabyldaıdy», - dedi M. Jórebekov.
Budan buryn habarlanǵandaı, Qazaqstanda gazben júretin avtokólik sany artqan.
2019 jyly suıytylǵan gazben júretin, ıaǵnı benzınnen osy otyn túrine aýysqan avokólik sany 140 myń boldy. Al 2021 jyly olardyń sany 313 myńǵa deıin jetti.
