Suıytylǵan gazdy naryqta ótkizý tártibi ashyq bolady – Májilis

ASTANA. QazAqparat – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine suıytylǵan gaz aınalymyn retteý protsesteriniń reınjınırıngi máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy, dep habarlaıdy QazAqparat tilshisi.

Osy qujat 2023 jylǵy 11 qańtarda birinshi oqylymda maquldandy.

«Bul qujatty Parlament depýtattary suıytylǵan munaı gazynyń aınalymyn retteýdiń quqyqtyq negizderin ózgertý maqsatynda ázirledi. Suıytylǵan gaz – shekteýli resýrs. Bir jaǵynan gaz tapshylyǵy óndiris kóleminiń tómendigimen baılanysty. Baǵany únemi shekteý zaýyttardyń jumysyn tıimsiz etedi. Ekinshi jaǵynan, gaz naryǵy óte jabyq, deldaldar jáne kóleńkeli eksport bar», - dedi depýtat Ekaterına Smyshlıaeva.

Onyń aıtýynsha, tapshy taýardy bólý men paıdalanýdyń barynsha ashyqtyǵyn qamtamasyz etý zań jobasynyń birqatar normalary arqyly iske asyrylady.

Birinshiden, biryńǵaı baǵa saıasatyn qalyptastyrý úshin bólshek saýda baǵalaryn retteýdi Básekelestikti qorǵaý agenttiginen Energetıka mınıstrligine berý eskerilgen.

Ekinshiden, suıytylǵan gazdy taratýdyń ashyq júıesin qurý qarastyrylǵan. Bul rette júk qujattary, fıskaldyq operatsııalar jáne jetkizýshi kompanııalardyń tirkelgen rezervýar syıymdylyǵy týraly málimetterdi alýdyń táýelsiz protsedýrasy qamtylady.

«Barlyq derek qoldanystaǵy aqparattyq júıelerden alynady. Suıytylǵan gazdyń aınalymy zaýyttan tutynýshylarǵa deıin ashyq bolady. Zań jobasynda usynylǵan suıytylǵan gaz naryǵyn retteý modeli ony qarapaıym tutynýshyǵa jetkizý tártibin jeńildetedi», - dedi E. Smyshlıaeva.

Budan basqa, zań jobasynda energetıka salasyndaǵy ýákiletti organǵa suıytylǵan gazǵa óndiristen bólshek saýdaǵa deıingi baǵa belgileý ádisnamasyn aıqyndaý quqyǵyn berý kózdelgen.