Suıytylǵan gaz Reseı benzınine táýeldilikti tómendetedi - Energetıka mınıstri

ASTANA. QazAqparat - Suıytylǵan gaz Reseı benzınine táýeldilikti tómendetedi. Bul týraly búgin halyqpen esepti kezdesýin ótkizip jatqan QR Energetıka mınıstri Qanat Bozymbaev aıtty, dep habarlaıdy QazAqparat.

«Sońǵy 3 jylda suıytylǵan gazdy tutyný 65 paıyzǵa ósti. Avtokólik ıeleri qajettilikteri úshin gaz satý jylyna 100 myń tonnadan 350-400 myń tonnaǵa deıin ósti. Bul óz kezeginde, Reseıdiń janar-jaǵar maıyna ımporttyq táýeldiligin tómendetýge áser etedi. Onyń ústine gazdyń baǵasy benzın baǵasymen salystyrǵanda 2-3 esege arzanyraq», - dedi mınıstr.

Onyń aıtýynsha, elimizde suıytylǵan gazdyń kóterme saýda baǵasy bekitilgen. Alaıda, shekaralas memleketterdegi kógildir otyn baǵasynyń qymbat bolýy elimizden gazdy zańsyz shyǵarýǵa túrtki bolýda.

«ARGÝS derekterine sáıkes, Reseıdiń shekaralas oblystarynda  suıytylǵan gazdyń ortasha kóterme baǵasy tonnasyna 148 myń, Tájikstanda 119 myń teńge bolsa, Qazaqstanda qosylǵan qun salyǵyn qosa alǵandaǵy bekitilgen kóterme baǵa 31 360 teńgeni quraıdy. Suıytylǵan gaz óndirisiniń ortasha ózindik quny tonnasyna 45 myń teńgege belgilengen. ıAǵnı, ol bekitilgen kóterme baǵadan qymbat. Sondyqtan, ózderińiz túsinetindeı, óndirýshiler ishki naryqqa suıytylǵan gazdy shyǵynmen jetkizýde», - dedi Q. Bozymbaev.