Suıytylǵan gaz, elektr qýaty men kómir baǵasy kóterilmek

NUR-SULTAN. QazAqparat – Shildeden bastap elimizde suıytylǵan gaz baǵasy qymbattaıdy. Energetıka mınıstrligi kelesi jylǵa deıingi shekti baǵany bekitti, dep habarlaıdy QazAqparat tilshisi.

«Іshki naryqtaǵy suıytylǵan gazdyń shekti baǵasy 2022 jylǵy 1 shildeden 2023 jyldyń 30 maýsymyn qosa alǵan kezeńge 1 tonnasy úshin 33 600 teńge mólsherinde bekitilsin. Bul – taýar bırjalarynan tys ótkiziletin jáne qun salyǵyn esepke almaǵandaǵy gazdyń shekti baǵasy», - delingen buıryqta .

Qazir suıytylǵan gaz baǵasynyń shekti mólsheri – 28 000 teńge. Sonymen qatar, Energetıka mınıstrligi elektr energııasy men kómir qunynyń da ósýi múmkin ekenin habarlady.

«Elektr energııasyn óndirýshi 26 uıym shekti tarıfti ózgertý boıynsha ótinim berdi. Osyǵan baılanysty 2022 jyldyń 1 shildesinen bastap baǵanyń ósýi boljanyp otyr. Sondaı-aq, jyl sońyna deıin Bogatyr-Kómir razrezindegi kómir baǵasy 30%-ǵa ósýi múmin», - delingen qujatta.

Eske sala keteıik, 6 qańtarda Úkimet gazdyń shekti baǵasyna qatysty 180 kúndik moratorıı jarııalaǵan edi.