Suıytylǵan gaz baıaǵyda qymbattaýy kerek edi – sarapshy
«Suıytylǵan gazdyń baǵasy baıaǵyda ósýi kerek edi. Bul da basqa taýarlar sııaqty naryqtyq taýar. Onyń negizgi jabdyqtary, materıaldar, shyǵyn materıaldary – ımporttalady nemese halyqaralyq baǵalarǵa tikeleı baılanysty bolady. Mysaly, metall Qazaqstanda óndiriledi, biraq tolyǵymen álemdik baǵalarǵa táýeldi», - dedi Oljas Baıdildınov QazAqparat tilshisine bergen suhbatynda.
Onyń aıtýynsha, Qazaqstanda qazir suıytylǵan gazdyń baǵasy óńir boıynsha da, álem boıynsha da eń tómen.
Global Petrol Prices málimetteri boıynsha, 27 jeltoqsanda munaı óndiretin Ázerbaıjanda suıytylǵan gaz lıtri 166 teńge, Reseıde – 182, Qyrǵyzstanda – 203, Belarýste – 212, Grýzııada – 275, Ýkraınada – 303 teńge bolǵan. Bul bizden birneshe ese kóp.
«2019 jyldan bastap suıytylǵan gaz ashyq bırjalyq alańdarda saýdalanady jáne 2022 jyldyń basynan bastap naryq baǵany suranys pen usynys negizinde qalyptastyrady. Kez kelgen adam ETS.kz bırjalyq alańynda akkredıtatsııadan óte alady jáne saýda-sattyqqa qatysýǵa nemese nátıjelerin qaraýǵa quqyly. Bul durys shara – barlyq taýarlar men qyzmetterdiń baǵasy naryq jaǵdaıyna aýysýy tıis. Energetıka mınıstrligi de, Mańǵystaý oblysynyń ákimdigi de saýda sattyqqa yqpal ete almaıdy jáne aralasa almaıdy», - dep qorytyndylady spıker.
Aıta keteıik, jyl basynda suıytylǵan gaz óndirýshiler munaı ónimderin elektrondy saýda arqyly satýǵa kóshti. Elektrondy saýdaǵa kóshý suranys pen usynys negizinde suıytylǵan munaı gazynyń baǵasyn teńdestirýge jáne jańa óndiris oryndaryn qurýǵa ınvestıtsııalar tartýǵa da múmkindik beredi.
Buǵan deıin Mańǵystaý oblysynyń ákimdigi suıytylǵan gaz baǵasynyń qymbattaýy týraly pikir bildirdi jáne jıi qoıylatyn suraqtarǵa jaýap berdi.
