Sýyqtan zardap shekken tashkenttikterdi qutqarýǵa ІІM men Ulttyq gvrdııa qosyldy

TAShKENT. QazAqparat - Ózbekstan astanasynda jalǵasyp jatqan aıaz ben kommýnaldyq júıelerdegi kúrdeli problemalarǵa baılanysty ІІM men Ulttyq gvardııa qyzmetkerleri sýyqtan zardap shekken tashkenttikterge kómek kórsetýge qosyldy, dep habarlaıdy QazAqparat menshikti tilshisi.

Ózbekstan prezıdenti Shavkat Mırzıeev 16 qańtarda halyqty energııa resýrstarymen qamtamasyz etý boıynsha keńes ótkizgennen keıin máseleni sheshýge eldiń Qorǵanys mınıstrligi, ІІM jáne Ulttyq gvardııa jumyldyryldy.

Ár aýdanda Ulttyq gvardııa, ІІM, TJM jaýapty qyzmetkerleri men kommýnaldyq qyzmet kásiporyndarynan quralǵan shtab pen jumys toby quryldy.

Jumys toptarynyń mindetine halyqty elektr energııasymen, gazben, sýmen jáne jylýmen qamtamasyz etý júıeleriniń jumys sapasyn tekserý; jylý jáne elektr energııasymen qamtamasyz etýdegi úzilisterdiń sebepterin anyqtaý jáne azamattardyń ótinishterin zertteý, anyqtalǵan kemshilikterdi joıý kiredi.

Ózbekstanda 11 qańtardan bastap respýblıka boıynsha aýa raıy shamadan tys sýytty. Túnde 19-20 gradýsqa deıin, kúndiz 17 gradýsqa deıin tómendedi. Osyǵan baılanysty barlyq eldi mekenderde elektr energııasy men gazdy tutyný birneshe esege artyp, bul óz kezeginde elektr qýatynyń jappaı úzilýine, turǵyn úılerde gaz qysymynyń tómendeýine ákeldi.

Buǵan deıin habarlaǵanymyzdaı, 16 qańtarda energııa resýrstarymen qamtamasyz etý jónindegi keńeıtilgen keńeste Ózbekstan prezıdenti qysqa daıyndyqtyń nasharlyǵy úshin birqatar joǵary laýazymdy sheneýnikterdi qyzmetinen bosatty.

Dúısenbiden bastap Qorǵanys mınıstrligi Tashkenttiń barlyq 11 aýdanynda halyqqa ystyq tamaq pen shaı taratatyn áskerı dala ashanalaryn ornalastyrdy. Halyqqa arnalǵan mundaı oryndar Tashkent, Namanǵan, Ferǵana oblystarynda da uıymdastyryldy.