Súıikti táttilerdegi transmaı mólsheri jańa standartpen anyqtalady
ASTANA. KAZINFORM — Qazaqstanda kondıterlik ónimderdegi transmaı mólsheri jańa standart boıynsha anyqtalady, dep habarlaıdy Saýda jáne ıntegratsııa mınıstrliginiń baspasóz qyzmeti.
Qazaqstanda kondıterlik ónimderdiń quramyndaǵy transmaı mólsherin anyqtaýdyń jańa ulttyq standarty bekitildi. Qujat 2026 jylǵy 1 qarashadan bastap kúshine endi. Jańa standart tátti taǵamdardyń quramyndaǵy transmaı mólsherin dál anyqtaýǵa jáne olardyń qaýipsizdigin baǵalaýǵa múmkindik beredi.
Buǵan deıin transmaı mólsherin anyqtaý úshin qoldanylǵan GOST 31754-2012 standarty negizinen maı ónimderi men taǵam óndirisine arnalǵan shıkizatty tekserýge baǵyttalǵan bolatyn. Al daıyn kondıterlik ónimderdiń, onyń ishinde kámpıt, pechene, tort jáne basqa da táttilerdiń quramyndaǵy transmaı mólsherin anyqtaýdyń biryńǵaı ádisi bolmaǵan.
Endi ST RK 4052-2026 «Kondıterlik ónimder. Qanyqpaǵan maı qyshqyldary transızomerleriniń massalyq úlesin anyqtaý ádisi» ulttyq standarty osy máseleni sheshýge múmkindik beredi. Qujat zerthanalarda ónim quramyndaǵy transmaı mólsherin ólsheýdiń jáne alynǵan nátıjelerdi baǵalaýdyń ortaq tártibin belgileıdi.
— Jańa standart kondıterlik ónimderdiń qaýipsizdigin baqylaýdy kúsheıtýge múmkindik beredi. Ásirese, shetelden ákelinetin ónimderdi tekserý kezinde mańyzdy. Biryńǵaı ádis arqyly ónim quramyndaǵy transmaı mólsherin naqty anyqtap, tutynýshylardyń densaýlyǵyn qorǵaýǵa yqpal ete alamyz, — dep atap ótti QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń tóraǵasy Janna Esenbekova.
Jańa standart 2026 jylǵa arnalǵan Ulttyq standarttaý jospary aıasynda ázirlendi. Ony daıyndaý kezinde kondıterlik ónimderdegi transmaı mólsherin anyqtaýǵa arnalǵan GOST R 54687-2011 standartynyń talaptary eskerildi.
Qujat tamaq ónimderiniń qaýipsizdigine qatysty Keden odaǵynyń TR TS 021/2011 jáne TR TS 024/2011 tehnıkalyq reglamentterimen baılanysty.
Ulttyq standartty «QazStandart» ázirlep, QR Saýda jáne ıntegratsııa mınıstrliginiń Tehnıkalyq retteý jáne metrologııa komıteti bekitti.
Budan buryn árbir jetinshi oqýshy kún saıyn tátti gazdalǵan sýsyn ishkenin jazǵanbyz.
