Súıikti isimmen aınalysý úshin ustalyq kýrstan óttim – petropavldyq sheber

Sheberdiń qolynda qarapaıym butaqqa da jan bitip, ómirge erekshe dúnıe keledi. Rýslannyń negizgi mamandyǵy – qarjyger-ekonomıst. Qazir ol Petropavldaǵy kólik kompanııalarynyń birinde aımaqtyq ókil bolyp eńbek etedi. Bos ýaqyty derlik shaǵyn sheberhanada ótedi. Onyń aıtýynsha, bul qyzyǵýshylyq bir sátte paıda bolǵan joq, onyń tamyry balalyq shaqta jatyr.

– Mektepte eńbek – súıikti pánderimniń biri bolatyn. Eń birinshi jasaǵan buıymym – aǵashtan jasalǵan kıim ilgish. Qyzyǵýshylyq ushqyny sol kezde tutandy. Biraq turmys qamy bul áýestikti keıinge ysyryp tastady. Mektepti bitirip joǵary oqý ornyna tústim, memlekettik qyzmette boldym, keıin mamandyǵym boıynsha jumys istedim. Otbasyn qurdym. Súıikti ispen aınalysýǵa múldem ýaqyt bolmady. Tek jasym 30-dan asqannan keıin ǵana qolyma quraldardy alýdyń sáti tústi. Basynda bul qarapaıym qajettilikten týyndady: saıajaıǵa qora saldym, oryndyqtar jasaý kerek boldy, - deıdi Rýslan Baıazıtov. 

Keıin arnaıy kýrstan ótip, aǵash ustalyǵynyń qyr-syryn kásibı meńgeredi. Qazir aǵashpen jumys isteý qajettilikten góri shyǵarmashylyqqa aınalǵan. 

– Meniń atam aǵash ustasy bolǵan eken. Ol turmysqa qajetti zattardy – qol jýǵyshtar, oryndyqtar jáne basqa da buıymdardy tapsyryspen jasaǵan. Bul óner maǵan osy atamnan daryǵan shyǵar, - deıdi sheber. 

Rýslan da aǵashtan túrli buıymdar jasaıdy. Sonyń ishinde oıynshyqtar – qýyrshaqqa arnalǵan úı, túrli pazldar, janýarlardyń músinderi de bar. Árbir jańa buıym - jańa ıdeıa, tájirıbe, izdenis.

– Ózdigimnen úırenemin. Internettegi beınesabaqtardy, basqa sheberlerdiń tájirıbesin qoldanamyn. Qatelikten qoryqpaý kerek. Ár jasaǵan isten sabaq alyp, sheberlikti shyńdaı berý kerek. Kiltsalǵyshtar, gúl sóreleri sııaqty zattardan bastasam, qazir jıhaz jasaýdy úırenip jatyrmyn. Úıdegi kireberistegi shkafty ózim istedim, - deıdi Rýslan Baıazıtov.

Rýslan úshin aǵash – tiri, tabıǵı, ózindik minezi bar materıal. Sheber kóbine qaraǵaıdy paıdalanady, sebebi ol qoljetimdi ári jumys isteýge yńǵaıly. 

– Aǵashtan jasalǵan buıymdar ekologııalyq taza, qaýipsiz, uzaqqa shydaıdy jáne eń bastysy – qol eńbeginiń energııasy bar. Sondyqtan tabıǵı materıalǵa degen suranys eshqashan joǵalmaıdy. Degenmen, bul ispen tabys tabý ońaı emes. Ónimniń ózindik quny joǵary, al naryqta arzan balamalar kóp. Sondyqtan jasaǵan buıymdarymdy satýdan góri, jaqyndaryma syılaǵandy jón kóremin, - deıdi sheber. 

Bolashaqta Rýslan sheberhana ashyp, iri jobalarmen aınalysýdy josparlap otyr. Mysaly, aǵashtan jıhazdar – ústelder men shkaftar jasamaq. 

Buǵan deıin SQO-da áli kúnge arqan esip, qamshy óretin sheber turatynyn jazǵan edik.