Sýyq jerde jumys istegen jaqsy - Úkimet basshysy
ASTANA. QazAqparat - QR Premer-Mınıstri Baqytjan Saǵyntaev eńbek naryǵynyń bolashaǵyna arnalǵan halyqaralyq forýmnyń plenarlyq májilisine qatysty. Sol jerde ol sheteldik sarapshylardyń baıandamasyn tyńdap, óz pikirin bildirdi, dep habarlaıdy QazAqparat tilshisi.
«Men sarapshy mamandardyń baıandamalaryn muqııat tyńdap shyqtym. Ózim naqty úsh sheshimge keldim. Birinshiden, Qazaqstan Úkimeti osy jerde aıtylǵan máselelerdiń bárin qolǵa alyp, tıisti sharalardy atqaryp jatyr. Eńbek naryǵyn damytýǵa qatysty barlyq sheshimderimiz sarapshylardyń oıymen sáıkes kelip tur. Bul - qýantarlyq jáıt. Ekinshiden, jańa ǵana Sıngapýrdan kelgen áriptesimiz aýa raıy týraly aıtty. Menińshe, ystyq ári qapyryq aýa raıyna qaraǵanda sýyq jerde jumys istegen jaqsy. Óıtkeni dalada aptap ystyq tursa, jumys isteý qıyn», - dedi B.Saǵyntaev.
Úkimet basshysy Azııa damý bankiniń sarapshylaryna da keńes berdi. Atalǵan mamandar Qazaqstanǵa araǵa 10 jyl salyp kelgenderi jaıynda aıtyp qaldy.
«Qazaqstanǵa 10 jyl saıyn emes, jıi kelip turyńyz degim keledi. Sonda bizdiń ne istep, ne qoıǵanymyzdy anyq biletin bolasyzdar. Sol kezde bizdiń naqty qaı baǵytta damyp kele jatqanymyzdy túsinesizder. Bul birge jumys isteýge jol ashady», - dep atap kórsetti B.Saǵyntaev.
Aıta keteıik, Premer-Mınıstrdiń ózi plenarlyq májiliste baıandama jasaǵan bolatyn. B.Saǵyntaev Úkimettiń eńbek naryǵyn damytýǵa qatysty josparlaryn jarııalady. Onyń aıtýynsha, aldaǵy 7 jylda 2 mıllıon jas maman - ýnıversıtet pen kolledj stýdentterine jumys taýyp berý kerek.
