Suıytylǵan munaı gazyn saqtaýǵa arnalǵan syıymdylyqtardy jer ústinde ornalastyrýǵa tyıym salynady
ASTANA. KAZINFORM – Májilis «Qazaqstan Respýblıkasynyń keıbir zańnamalyq aktilerine gazben jabdyqtaý jáne taýarlyq gazdy uqypty tutyný máseleleri boıynsha ózgerister men tolyqtyrýlar engizý týraly» Zańdy qabyldady.
Qujat boıynsha baıandama jasaǵan Vera Kımniń aıtýynsha, zań jobasy Májilis depýtattary tarapynan bastamashylyq etilgen jáne bıyl 11 aqpanda birinshi oqylymda osy zań jobasy maquldandy.
Zań jobasynyń negizgi normalary:
- gazdy únemdi tutynýdy yntalandyrýǵa;
- esepke alýdyń tsıfrlandyrylýy men ashyqtyǵyn qamtamasyz etýge;
- gaz taratý uıymdarynyń qyzmetin memlekettik retteýge;
- baǵa qalyptastyrý tásilderin jetildirýge;
sondaı-aq bıýdjettik gazdandyrý jobalaryn iske asyrý barysynda gaz jáne gazben jabdyqtaý salasyndaǵy ulttyq operatordyń baqylaýyn kúsheıtýge baǵyttalǵan.
Zań jobasy mynadaı máselelerdi de retteıdi:
- eki jáne odan da kóp gaz taratý uıymdarynyń taýarlyq gazdy gaz taratý júıesi arqyly bir mezgilde tasymaldaýyna tyıym salý;
- gaz taratý uıymy úshin magıstraldyq gaz qubyryna tikeleı qosylýǵa qoıylatyn talaptardy belgileý;
- gaz taratý uıymdary bolyp sanalmaıtyn tulǵalarǵa gaz taratý júıesiniń jekelegen obektilerin salý múmkindigin berý, sondaı-aq gaz taratý obektileriniń qurylysyna baılanysty shyǵyndardy óteý shartymen gaz taratý uıymdarynyń olardy ıelikten shyǵarýy.
Zań jobasy boıynsha ekinshi oqylymǵa jumys barysynda depýtattar:
- tıisti aýmaqtaǵy avtogaz quıý stantsııalarynyń shekti sanyn eskere otyryp, avtogaz quıý stantsııalaryn salý úshin jer ýchaskelerin berýge jáne olardyń nysanaly maqsatyn ózgertýge;
- bekitilgen tutyný normalarynan asatyn kólemderde taýarlyq gazdy bólshek saýdada ótkizý baǵasyn aıqyndaý tetigin engizýge;
- kóppáterli turǵyn úılerdi jylýmen jabdyqtaý úshin suıytylǵan munaı gazynyń bólshek saýdadaǵy baǵalaryn memlekettik retteýdi engizýge;
- elektr energııasyn berý jónindegi energııa berýshi uıymdardyń qyzmetin retteýge;
- energııa óndirýshi uıymdardyń ınvestıtsııalyq kelisimderdi oryndaýyn baqylaý tetigin belgileýge, sondaı-aq olardy oryndamaǵany úshin yqpal etý sharalaryn engizýge;
- áleýmettik baǵyttardy alyp tastaýdy eskere otyryp, tutynýshylardy taýarlyq gazdyń iri kommertsııalyq tutynýshylary sanatyna jatqyzý ólshemsharttaryn naqtylaýǵa;
- suıytylǵan munaı gazyn saqtaýǵa arnalǵan syıymdylyqtary jer ústinde ornalastyrylatyn avtogaz quıý stantsııalaryn salýǵa, ornalastyrýǵa jáne paıdalanýǵa tyıym engizýge;
- ýákiletti organnyń aqparat usyný mindetin bekitý men monıtorıng júrgizýin qosa alǵanda, gaz jáne gazben jabdyqtaý salasyndaǵy otandyq óndirýshilerdi jáne kadrlyq áleýetti qoldaýǵa;
- paıdalanylmaǵan fraktsııalardy óndirýshilerge qaıtarý arqyly suıytylǵan munaı gazyn bólý tetigin jetildirýge, munaı-gaz hımııasy boıynsha ınvestıtsııalyq jobalardy iske asyrýshylar úshin arnaýly quqyqtyq rejım engizýge qatysty túzetýler engizdi.
- Memleket basshysy derekterdi óńdeý ortalyqtary alqabyn qurý jónindegi tapsyrmasyn oryndaý maqsatynda depýtattar «Elektr energetıkasy týraly» Qazaqstan Respýblıkasynyń Zańyna energııa óndirýshi uıymdardyń qosalqy jabdyqtaryna qatysty ınvestıtsııalyq kelisimder jasasý múmkindigin kózdeıtin ózgerister engizýdi usyndy. Atalǵan normalardy iske asyrý energııa óndirýshi uıymdardyń jumys senimdiligin arttyrýdy jáne tsıfrlyq ınfraqurylymdy damytýdy qamtamasyz etedi, - dedi Vera Kım.
Palat zań jobasyn qabyldap, Senat qaraýyna jiberýge sheshim qabyldady.
Aıta keteıik, búginde elde shamamen 13 mln adam tabıǵı gazǵa qol jetkizgen.
