Suıytylǵan munaı gazdyń kóterme baǵasy qaıta bekitiledi — Energetıka mınıstrligi

ASTANA. KAZINFORM — Qazaqstan Respýblıkasynyń Energetıka mınıstrligi suıytylǵan munaı gazyna shekti kóterme baǵany belgileý týraly buıryqtyń qoldanylýyn tonnasyna 45 158 teńge deńgeıinde uzartý týraly NQA jobasyn jarııalaǵanyn habarlady. 

Buıryq jobasyna sáıkes sheshim 2025 jyldyń 1 qańtarynan bastap kúshine enedi.

2024 jylǵy 26 maýsymda Energetıka mınıstriniń buıryǵymen suıytylǵan munaı gazyn óndiretin zaýyttar úshin shekti kóterme baǵalar 2024 jylǵy 1 shildeden bastap qoldanysqa engizile otyryp, tonnasyna 45 158 teńge deńgeıinde bekitildi. Buıryq 2024 jylǵy 31 jeltoqsanǵa deıin jaramdy.

Osyǵan baılanysty Energetıka mınıstrligi 2025 jylǵy 1 qańtardan bastap shekti kóterme baǵalardy buryńǵy deńgeıde buıryqpen qaıta bekitýdi josparlap otyr.

Qujatta kórsetilgendeı, joba «gaz jáne gazben jabdyqtaý týraly» Zańnyń 6-babynyń 7-tarmaǵyna, sondaı-aq Energetıka mınıstriniń buıryǵymen bekitilgen Qazaqstan Respýblıkasynyń taýar bırjalarynan tys ishki naryǵyna suıytylǵan munaı gazyn jetkizý jospary sheńberinde ishki naryqta taýarlyq gazdy kóterme saýdada ótkizýdiń, suıytylǵan munaı gazyn kóterme jáne bólshek saýdada ótkizýdiń shekti baǵalaryn belgileý qaǵıdalarynyń 17-tarmaǵyna sáıkes ázirlengen.

Jobany iske asyrý memlekettik bıýdjetten qarjy shyǵyndaryn talap etpeıtini, jobany qabyldaý áleýmettik-ekonomıkalyq nemese quqyqtyq teris saldarǵa alyp kelmeıtini, sondaı-aq ulttyq qaýipsizdikti qamtamasyz etýge áser etpeıtini jazylǵan.