Suıytylǵan gazdyń arzandaýy shetelge zańsyz shyǵarylýyna ákep soqty – Úkimet basshysy
ASTANA. KAZINFORM – Qazaqstanda suıytylǵan gazdyń baǵasy Reseı, Ózbekstan, Qyrǵyzstan jáne alys shet eldermen salystyrǵanda shamamen 2 ese tómen. Bul týraly Úkimet basshysy Oljas Bektenov málim etti.
«Suıytylǵan munaı gazymen qamtamasyz etý máselesine kelsek. Otynnyń bul túri munaı-gaz hımııasy úshin qundy ári tapshy shıkizat. Bul rette Qazaqstanda suıytylǵan gazdy avtomobıl otyny retinde paıdalaný kólemi artyp keledi. Qazaqstanda onyń bólshek saýdadaǵy baǵasy Reseı, Ózbekstan, Qyrǵyzstan jáne alys shet eldermen salystyrǵanda shamamen 2 ese tómen. Al baǵanyń tómen bolýy iri kólemde suıytylǵan gazdyń shektes elderge zańsyz shyǵarylýyna ákep soqty», - dedi Oljas Bektenov Úkimet otyrysynda.
Premer-Mınıstr buǵan deıin tıisti memlekettik organdarǵa suıytylǵan gazdyń «kóleńkeli» eksportyn, onyń ishinde qylmystyq jaýapkershilikti belgileý arqyly jolyn kesý jónindegi jumysty kúsheıtýdi tapsyrǵanyn eske saldy.
«Ulttyq qaýipsizdik komıtetiniń derekterine sáıkes, suıytylǵan munaı gazyn shetelderge zańsyz shyǵarýdyń 14 faktisiniń joly kesildi. Bul jumysty jalǵastyrý qajet. Ásirese, tutyný kólemi negizsiz qubylyp otyrǵan Atyraý jáne Abaı oblystary men birqatar shekaralas óńirlerdegi jaǵdaıdy erekshe baqylaýǵa alýdy tapsyramyn. Sondaı-aq myna máselelerge nazar aýdarý qajet», - deıdi ol.
