Suıytylǵan gaz tapshy: Aqtóbedegi beketterde uzynsonar kezek paıda boldy
AQTÓBE. KAZINFORM — Aqtóbe qalasyndaǵy gaz quıý beketterinde uzynsonar kezek túzildi. Qazir gaz lıtri 59 tg satylyp jatqanymen, júrgizýshiler saǵattap kútýge májbúr.
Aqtóbe qalasyndaǵy gaz quıý beketteriniń keıbiri talony bar júrgizýshilerge qyzmet kórsetedi. Al qolma-qol aqshaǵa satatyn gaz quıý beketterinde uzynsonar kezekti kórýge bolady.
— Bıyl birinshi ret osyndaı jaǵdaı bolyp tur. Tapshylyqtyń bilingenine 3-4 kún boldy. 1-2 saǵat kútip, kezekke turamyz. Tipti úsh saǵat kútetin kez bolady. Tańerteń, keshke osylaı kezekte turamyn. Gaz baǵasy lıtrine 59 teńge. Biraq kóp jerden tappaısyń, — dedi aqtóbelik júrgizýshi Aıdos Berdibaev.
Aqtóbe oblystyq kásipkerlik basqarmasynyń habarlaýynsha, osy aıda QR Energetıka mınıstrligi 10 960 tonna suıytylǵan gaz bólgen. Suranys odan artyq.
— Aqtóbe oblysyna 16 000 tonna gaz qajet. Energetıka mınıstrligi shilde aıyna 10960 tonnasyn ǵana bóldi. Qazirgi kezde zaýyttar 264,3 tonna otyndy jiberýdi josparlap otyr. Osy aptada Atyraý munaı óńdeý zaýytynan taǵy 504 tonna suıytylǵan otyn jetkiziledi, — dep habarlady basqarma.
