Suıytylǵan gaz baǵasyn 2030 jylǵa deıin memleket retteıtin boldy — Zań normasy

ASTANA. KAZINFORM — Suıytylǵan gazdyń baǵasyn 2030 jylǵa deıin memleket ózi retteıdi. Senat eki oqylymda qarap, maquldaǵan bırja saýdasy jáne kásipkerlik máseleleri boıynsha ózgerister men tolyqtyrýlar engizýdi kózdeıtin zańda osyndaı norma bar.

Qujatty tanystyrǵan senator Shákárim Buqtuǵutov bul zań 2 Kodekske jáne 9 zańǵa ózgerister men tolyqtyrýlar engizýge arnalǵanyn aıtty.

Atap aıtqanda:

— áleýmettik mańyzy bar bırjalyq taýarlardyń tizbesin qalyptastyrý;
— «standarttalǵan taýar», «standarttalmaǵan taýar» jáne «standartty aýktsıon rejım» uǵymdaryn alyp tastaý;
— taýar bırjalarynyń brokerleri men klırıngtik ortalyqtaryn lıtsenzııalaý tetigin engizý;
— taýar bırjalaryn shaǵyn jáne mıkrobıznes sýbektileri sanatynan shyǵarý;
— taýar bırjalaryna memlekettik baqylaýdy keńeıtý;
— taýar bırjasy arqyly memlekettik satyp alýdy júzege asyrý múmkindigin boldyrmaý;
— taýar bırjasyna shyǵý úshin jarnalardyń biryńǵaı eń joǵary mólsherin belgileý;
— bırjalyq saýda-sattyqqa josyqsyz qatysýshylardyń tizilimin qalyptastyrý.

— Zańda suıytylǵan munaı gazyn taýar bırjalary arqyly satýdy 2030 jylǵa deıin, al elektr qýatyn retteý qyzmetterin satyp alýdy kelesi jyldyń shildesine deıin keıinge qaldyrý týraly norma bar, — dedi Shákárim Buqtuǵutov.

Bul normaǵa túsinikteme bergen Energetıka vıtse-mınıstri Suńǵat Esimhanov 2030 jylǵa deıin suıytylǵan gazǵa degen ishki suranysty tolyq qamtamasyz etetindeı júıe quryp, osydan keıin ǵana bul ónimniń saýdasyn bırjaǵa kóshirý týraly sheshim qabyldanǵanyn aıtty. Onyń sózinshe, 2030 jylǵa deıin suıytylǵan gaz baǵasy birtindep kóterilip otyrady.

Eske salsaq, qarasha aıynda suıytylǵan gazdy elden syrtqa shyǵarýǵa qoıylǵan shekteý jarty jylǵa uzartylǵan edi.