Suıytylǵan gaz baǵasy óte tómen, sala shyǵynǵa ushyrap otyr – mınıstr
ASTANA. KAZINFORM – QR Energetıka mınıstri Almasadam Sátqalıev eldegi suıytylǵan munaı gazy baǵasy óte tómen ekenin synǵa aldy.
Mınıstrdiń aıtýynsha, 2023 jyly ishki naryqta suıytylǵan munaı gazyn tutyný aldyńǵy 2022 jylmen salystyrǵanda 400 myń tonnaǵa ósken jáne 2,2 mln tonnany quraǵan.
«Búgingi kúni suıytylǵan munaı gazyna belgilengen shekti kóterme saýda baǵasy ony óndirý qunynan tómen. Gaz óndirisiniń tıimsizdigine baılanysty sala shyǵynǵa ushyraýda, turaqty jóndeý jumystary júrgizilmeıdi jáne jańǵyrtýǵa qarajat salynbaıdy», - dedi A. Sátqalıev mınıstrlik alqasynyń otyrysynda.
Mınıstr Qazaqstanda suıytylǵan gazǵa eń tómen baǵa tirkelgenin – óńirge baılanysty 54-86 teńge aralyǵynda ekenin atap ótti. Salystyrý úshin Reseıde bir lıtr gazdyń baǵasy 165 teńgeni, Qyrǵyzstanda – 159 teńgeni, Ázerbaıjanda – 171 teńgeni, Tájikstanda – 273 teńgeni quraıdy.
«El halqynyń ishki qajettilikterin úzdiksiz qamtamasyz etý maqsatynda Energetıka mınıstrligi men «Teńizshevroıl» JShS arasynda aı saıyn 20 myń tonna suıytylǵan munaı gazyn jetkizý týraly kelisimge qol qoıyldy. Búgingi tańda «QazaqGaz» UK» AQ jáne Soltústik Kaspıı jobasynyń aktsıonerleri jylyna 700 myń tonnaǵa deıin Qashaǵan suıytylǵan munaı gazyn satyp alý-satý shartyna qol qoıý máselesin pysyqtaýda», - dedi A. Sátqalıev.
