Suıytylǵan gaz baǵasy benzın baǵasymen teńesýi múmkin – Energetıka mınıstri
Energetıka mınıstri Almasadam Sátqalıev Májilistiń jalpy otyrysynan keıin BAQ ókilderiniń saýalyna bergen jaýabynda suıytylǵan gaz baǵasy benzın baǵasymen teńesýi múmkin ekenin málim etti, dep habarlaıdy Kazinform.
«Bizde suıytylǵan munaı gazyn tutyný kólemi kúrt ósip ketti. Ol negizi avtomobılderdi gazǵa aýystyrýmen baılanysty. Ásirese kólikterdi áýesqoı tásilmen gaz jaǵatyn etip qaıta jabdyqtaý jappaı beleń aldy. 9 aıdyń ishinde suıytylǵan gazdyń óndirisinen týyndaıtyn teńgerim 25 paıyz artty. Bizge qosymsha kólemder izdeýge týra kelip otyr. Biz «Teńizshevroılmen» kelissóz júrgizdik. Olar ishki naryqqa aı saıyn qosymsha 10 myń tonna jetkizip tur. Biz «QazMunaıGazdyń búkil kólemin ishki naryqqa baǵyttadyq. Osynyń esebinen teńgerimdi ustap turmyz. ıAǵnı, qazir suıytylǵan gaz tapshylyǵy joq. Óńirlerde jetkizýden týyndaǵan máseleler bar shyǵar. Biz osyny problema dep otyrmyz», - dedi ol.
Mınıstr qazaqstandyqtarǵa kóligin gazǵa aýystyrýǵa asyqpaý kerek degen keńesin taǵy qaıtalady.
«Mashınalardy osyndaı qarqynmen gazǵa aýystyra beretin bolsa, keleshekte gaz óńdeý qýattarynyń áleýeti qysqa merzimdegi qajettilikterge jetpeı qalýy múmkin. Tipti suıytylǵan munaı gazyn ımporttaýǵa májbúr bolýymyz múmkin. Ol kezde baǵa múlde basqasha bolady. Tipti benzın baǵasymen salystyratyndaı deńgeıge shyǵýy yqtımal. Sondyqtan avtomobıl tizgindeýshilerdi kólikterin gazǵa aýystyrýǵa asyqpaýǵa úndep júrmiz», - dedi Almasadam Sátqalıev.
