«Súıinshi áke!» degen bir aýyz habaryn estigimiz keledi - Frıstaılshy Aqmarjan Qalmyrzaevanyń ákesi

Osyǵan oraı Aqmarjannyń ákesi Qaırat Satbekulymen telefon arqyly tildesip, az-kem áńgimege tartqan edik.

- Qaırat Satbekuly, ózińizdi QazAqparat oqyrmandaryna tanystyryp ótseńiz...

- Men Qaırat Satbekuly Qalmyrzaevpyn, Shymkent qalasynyń turǵynymyn.

- Qaıda, kim bolyp qyzmet etesiz?

- Ortalyq Azııa Innovatsııalyq ýnıversıtetinde «Sport» kafedrasyn basqaramyn.

- Qyzyńyz Aqmarjan Aq Olımpıadada el namysyn qorǵaýǵa Beıjińge attanyp ketkenine aptadan astam ýaqyt boldy. Balańyzdan qandaı úmit kútip otyrsyz?

- Qaı ata-ana óziniń balasyn bıikterden kórgisi kelmeıdi deısiz. Biz de sol qyzymyz Aqmarjan eliniń baıraǵyn jelbiretip, abyroımen oralsa eken dep otyrmyz. «Súıinshi áke!» degen bir aýyz habaryn estigimiz keledi. Kúnde týys-týǵan, dos jarandarymyz da Aqmarjan jarysqa qashan shyǵady dep qońyraý shalyp, surap jatyr. Búgin Olımpıada oıyndaryndaǵy alǵashqy jarysyna shyǵady. B árimiz t ek sáttilik serik bolsa eken dep tileıik.

- Aqmarjanmen Beıjiń Olımpıadasyna ketkeli beri sońǵy ret qashan sóılestińiz? Kóńil-kúıi qalaı sııaqty?

- Qyzymyzdyń úıde bolǵanynan túzde júrgeni kóp. Birde el ishinde jattyǵýda júrse, birde shetelde jarysta júredi. Bir ketkende aılap ketedi. Biz tek, telefonda, áleýmettik jelilerde ǵana tildesip, amandyǵyn bilip turamyz. Beıjińge aman-esen jetip aldy. Jaqynda ǵana sóılestik. Kóńil kúıi bári jaqsy. Endi sol el úmitin aqtap bir medal alsa dep otyrmyz.

- Qyzyńyz bul sportqa qashan, qalaı keldi?

- 11 jasynda keldi. Bul sportty ózi tańdady. Negizi alǵash ret kórkem gımnastıkamen aınalysqan bolatyn. Ol sport túrinen de jaqsy kórsetkishterge qol jetkizdi. Biraq keıin, osy frıstaılǵa aýysyp ketti. Qazirgi tańdaǵan sportynan da jaman bolǵan joq. Kóptegen álemdik jarystarǵa qatysyp júldegerler qatarynan kórinip júr. Endi osy Olımpıadanyń bir medalin alsa dep armandaımyz.

- Aqmarjannyń qandaı jetistigi esińizden ketpeıdi?

- Alǵash gımnastıkamen aınalysyp júrgen kezdegi jeńisteri esimnen ketpeıdi. Ol kezde kishkentaı-tuǵyn. Barǵan jarystarynyń barlyǵynan júldesiz qaıtpaıtyn. Bir kúni «áke kelip syılyǵymdy alyp ketińizshi» deıdi. «Ol ne syılyq kótere almaıtyn» desem, «úlken qorapta, kelińiz» dep qoımaıdy. Barsam shynymen úlken qorap eken. Іshindegi syılyq kádimgi televızor. Ol kezdegi televızor shynymen úlken edi ǵoı. Keıin, Aqmarjan úlkeıdi, eseıdi, esin jınady. Bala kezinde oblystarǵa shyǵaryp salyp, saǵynyp kútip alatynbyz. Qazir jylyna bir-eki ret keledi. Kettim dep ketip jatady. Biz tek syrttaı amandyǵyn tilep, ózi súıgen kásibine kedergi keltirmeımiz.

- Aqmarjan sporttan bólek taǵy qandaı istermen aınalysqandy unatady? Bos ýaqytyn úıde qalaı ótkizedi?

- Úıde bolǵanda anasyna kómektesedi. Anasy qaladaǵy mektepterdiń birinde sýret salý muǵalimi. Anasymen birge sýret salǵandy unatady. Tamaqty ózi pisirgendi jaqsy kóredi.

- Jalpy, qyzyńyzdyń sportpen aınalysqanyna qýanasyz ba, álde qarsy bolǵan kezderińiz boldy ma?

- Jastyq shaǵynda árıne sportpen aınalysqany jaqsy. Biraq, qyz balaǵa sport máńgilik joldas bola bermeıdi. Men Aqmarjanǵa 20 jasqa tolǵan kezinde «qyzym, endi sportty qoısań qaıtedi» dep aıttym. Sol kezde qyzym maǵan «áke arǵy oıyńyzdy túsinip turmyn. Ár nárseniń erteme, keshpe óz ýaqyty bolady. Men de sol ózim josparym boıynsha ýaqyty bolǵanda qoıa qoıamyn» dedi. Sodan qaıtyp eshteńe aıtqan emespin. Jalpy, qazirgi sporty ekiniń biri jalynan ustaı bermeıtin asaý sporttyń biri. Ákesi bolǵan soń densaýlyǵyn oılap, ýaıymdaıtyn kezimiz bolady. Mine, bıyl jıyrma alty jasqa tolyp otyr. Aqyl toqtatyp, tolysqan kezderi ǵoı. Ary qaraı qyzym qandaı jolmen júredi, ózi sheshedi.

- Áńgimeńizge rahmet! Aqmarjanǵa sáttilik tileımiz.