Súıinbaı Aronulynyń mereıtoıyna arnalǵan «Alataýdyń aqıyǵy» atty kesh ótedi
ASTANA. QazAqparat - Astanada 9 maýsymda Alty alashtyń ardaǵy, aqyn - Súıinbaı Aronulynyń týǵanyna 200 jyl tolýyna arnalǵan «Alataýdyń aqıyǵy» atty mádenı tanymdyq kesh ótedi. Bul týraly Halyqaralyq Túrki akademııasynyń baspasóz qyzmetinen habarlandy.
Keshke Qazaqstannyń, Qyrǵyzstannyń, Ózbekstannyń tanymal ǵalymdary men ónerpazdary qatysady dep josparlanyp otyr. Bul keshti Halyqaralyq Túrki Akademııasy «Nur Otan» partııasynyń qoldaýymen uıymdastyryldy.
Jetisý aqyndarynyń altyn dińgegi, aıtys aqyny Súıinbaı Aornuly Almaty oblysy Jambyl aýdanynda dúnıegen kelgen. Súıinbaı 13-15 jasynan aqyndyq jolyn qýady. Baıaǵynyń neshe alýan jyr-dastandaryn, ańyz-qıssalaryn jıyn-toılarda jatqa aıtyp, óz janynan da shyǵarady. Óleńdi serik etken jyraýdyń 60 jyldan astam ýaqyt boıy toqtaýsyz shyǵarǵan jyr murasy ushan-teńiz bolǵan eken.
«Soqqan jeldeı, aqqan seldeı» óren júıriktiń aqyndarmen aıtystary, el qorǵaǵan erlerge arnaǵan uzaq jyrlary, arnaý, syqaq-syn, minezdeme, qaǵytpa óleńderi, ómir týraly tolǵanystary óte kóp bolǵan.
Ókinishtisi, sonyń bári bizdiń dáýirimizge túgel jetpegen. Al bizge jetken týyndylary Súıinbaıdyń taban astynda taýyp aıtatyn ǵajaıyp tapqyr, ádil de týrashyl, dańǵyl da dana aqyn bolǵanyn kórsetedi.
Súıekeńdi qazaq óleńiniń ǵana emes, qyrǵyz eliniń de ataqty aqyndary dara talant retinde baǵalaǵan. XIX ǵasyrdyń ekinshi jartysynda Jetisý jeriniń óleń týyn aspandatqan Jambyl bastaǵan sańlaq talanttary Súıekeńniń shákirtimiz dep, uly aqyndy pir tutqany da belgili.
