Súıiktisin kóshkinnen qutqara almaǵan alpınıst ózin-ózi óltirdi
ASTANA. QazAqparat - Álemge áıgili amerıkalyq alpınıst Heıden Kennedı súıiktisi Inge Perkınsti qar kóshkininen qutqara almaǵan soń, ózine-ózi qol jumsady.
Jan túrshiktirer qaıǵyly oqıǵa jaıly CBS telearnasy habarlady.
Montana shtatynyń taýlarynda shańǵy teýip júrgen Heıden men Inge qar kóshkinine ushyraıdy. Heıdendi jarym-jartylaı qar basyp qalady, al onyń súıiktisi tájirıbeli alpınıst Inge joǵalyp ketedi. Jantalasa qardy arshyp Ingeni izdegen Kennedı taba almaıtynyna kózi jetken soń jyldam qutqarý qyzmetin shaqyrady. Qutqarýshylar qyzdy bir metrlik qar qabatynyń astynan tapqanymen ony ajaldan arashalap qala almady.
Súıiktisiniń qaıǵysyn kótere almaǵan alpınıst óz-ózine qol jumsaǵan. Bul jaıly jýrnalısterge Heıden Kennedıdiń týystary aıtty.
2014 jyly Elevation Outdoors jýrnaly Heıden Kennedıdi «Ǵalamshardaǵy úzdik jas alpınıst» dep ataǵan bolatyn. 27 jasynda ol Jer sharynyń eń bıik shyńdaryna kóterilip, kóptegen rekordtardy jańartqan edi.
